Türkiyə karyerası istənilən səviyyədə keçməyən və aşağı məhsuldarlığa görə tez-tez tənqid olunan ''Fənərbaxça''lı Yussef Ən-Nəsiri ilə bağlı yeni xəbər var.

Təcrübəli futbolçu bu transfer dönəmində İstanbul nəhəngini tərk edə bilər. Belə ki, Qətər təmsilçisi ''Əl-Sədd'' onun xidmətində ciddi şəkildə maraqlıdı. Tanınmış italiyalı mütəxəssis Roberto Mançininin çalışdırdığı ''Əl-Sədd'' ''sarı-lacivərdlilər''ə rəsmi təklif irəli sürüb.

Türkiyə mətbuatının yazdığına inansaq, qətərlilər ''5+25'' milyon avroluq paket təklif ediblər. Yəni onlar yarım mövsümlük icarə üçün 5 milyon avro ödəməyə hazırdılar. Mövsümün sonunda isə daimi transfer üçün 25 milyon avro ödəmək niyyətindədilər. ''Fənər'' rəhbərliyinin bu təklifə necə cavab verəcəyi bilinmir. Tərəflər arasında baş tutacaq son görüşün ardından bütün detallara aydınlıq gələcək.

Ən-Nəsiri hazırda Afrika Kubokunda Mərakeş yığmasının heyətindədi. ''Fənər''lə 2029-a qədər müqaviləsi olan 28 yaşlı forvard bu mövsüm 25 rəsmi oyunda iştirak edərək aktivinə yalnız 8 qol, 1 məhsuldar ötürmə yazıb.