“Qarabağ” sabah Çempionlar Liqasının liqa mərhələsinin 7-ci turunda “Ayntraxt”ı qəbul edəcək.

“Football-plus.az” ağdamlıların baş məşqçisi Qurban Qurbanovun oyunöncəsi mətbuat konfransından hesabatı təqdim edir.

- Sizi yenidən burda görmək  çox xoşdu. Tarixdə Azərbaycan üçün ağır gündü. Başımız sağ olsun. Vacib oyundu. Hazırlaşmağa çox vaxtımız olmadı. Az vaxtdan səmərəli istifafə etdik. Bir oyun da oynasaq, yaxşı olardı. Bu oyuna əhəmiyyət verdi futbolçularım. Rəqibin düşərgəsində dəyişikliklər olub. Baxımlı oyun göstərməyə çalışacağıq.

- Rəqibdəki dəyişiklik planlarınızı pozdu?
- Düşünmək olar. Yanvardan bəri üç oyun oynadılar. Fərqli heyət, sistemlə oynayırdılar. Ona uyğun iş aparırdıq. Bu dəyişiklik… Diqqətli olmalıyıq. Belə halla birinci dəfə qarşılaşmırıq. Rəqib təcrübəlidi. Özünəməxsus alman intizamı var. İnanıram ki, uğurlu nəticə əldə edə bilərik.

- Rəqib Bakıya sabah gələcək. Bu üstünlük ola bilər? Hava şəraiti oyuna təsir edə bilər?
- Elə də əhəmiyyət daşımır. Biz də belə etmişik. Öz proqramları belədi.

- Aleksandr Meyer “Qarabağ”a 3 qol vurub. Bunun sizin üçün əhəmiyyəti var?
- Bu dəfə qol vura bilməyəcək (gülür). Hər şəraitdə oynamağı bacarmalıyıq. İnanıram ki, uğurlu oyun olacaq.

- Bu qışda transfer olacaq?
- Gözlənti çoxdu. Alınmalıdı. Maneə olmasa, transfer olacaq.

- Montiel sabah oynaya bilər?
- Xeyli vaxt futboldan uzaq qalmışdı. Durumu pis deyil. Futbolçu elə məxluqdu ki, soruşsan, deyəcək ki, optimal formadayam. Gələndən çox əziyyət çəkib. İşinə peşəkarcasına yanaşdı. Amma hələ də onu tam hazır hesab etmirəm. 1 ildən çoxdu ki, futbol oynamırdı. Oyun təcrübəsinə ehtiyacı var. Hazırlığından razıyam. Daha yaxşı ola bilər. Məşqçi kimi çalışacam ki, daha yaxşı olsun.

- ÇL ölkə çempionatına təsir edəcək?
- Bəli. Bəzən belə oyunlardan sonra xal itkilərimiz olub. Avropada da belədi. Amma yerimizi qoruyub saxlaya bilmişik. Mane törədir. Fikrimiz bu oyunlaradı. Amma müvəqqətidi. Gedişatda köklənirik. Çətin olsa da, bu bizim işimizdi. 11 yox, 22-23 futbolçumuz var. Digər futbolçuların da üzərinə böyük məsuliyyət düşür. “İkinci heyət” deyək. İnanıram ki, futbolçuların xətrinə dəyməz. Onlar daha faydalı olur. Onlar olmasa, Avropada çıxış edə bilmərik. Gözlənilməz məğlubiyyətlər olur.

MÜZƏFFƏR QULUZADƏ