"Qarabağ" sabah Çempionlar liqasının pley-off mərhələsində “Ferentsvaroş”u qəbul edəcək.

Oyunöncəsi mətbuat konfransında “Qarabağ”ın baş məşqçisi Qurban Qurbanov media nümayəndələrinin önünə çıxıb.

- Belə vacib oyundan əvvəl sizi görmək xoşdu. Bir əcnəbi jurnalist qonağımız var, Bakıya xoş gəlib. Hamımız oyunun əhəmiyyətini dərk edirik. Bizim üçün çox vacib oyundu. Həddindən artıq soyuqqanlı olmalıyıq, bu çox vacibdi. Çox yaxşı rəqibə qarşı oynayırıq. İlk oyunun nəticəsi üstünlüyümüzü göstərir, amma biz qətiyyən belə düşünmürük. Çox təhlükəli rəqibdi, özünəməxsus oyun tərzi var. Rəqibin daha çox risk edəcəyini düşünürük. Sona qədər soyuqqanlı davranaraq nəticə qazanmağa çalışacağıq.

- Özünüz də demişdiniz ki, nədənsə mən də, başqaları da rəqibi keçdiyimizi düşünür. Sabah komanda qapısını toxunulmaz saxlamaq üçün oynayacaq?
- Yaxşı nəticəmiz öz oyun üslubumuza görə olub. Bu nəticəni qorumaq deyə düşüncə yoxdu. Nə məndə, nə də futbolçularda. Bacardığımızı etməyə çalışacağıq. Məqsədimiz daha baxımlı oyun göstərməkdi. Qol buraxmamaq üçün müdafiəyə qapanmayacağıq. Həm azarkeşlər, həm də özümüz üçün oynayırıq. Bizi meydanda hansısa problem gözləyə bilərmi? Bunu deyə bilmərəm. Rəqib sabah çox risk edəcək, biz də bunun qarşısını almağa çalışacağıq.

- Psixoloji baxımdan komandanı oyuna hazırlamaq çətin deyil?
- Ordakı oyundan sonra bizi cütün qalibi kimi görürlər. Mənim onlarla danışığım bu yöndədi ki, sabaha hazır olmalıdılar. Bu amil bizə çox mane ola bilər. İnanıram ki, bunun öhdəsindən gələcəyik.

- 2017-də daha çox rahat idiz, yoxsa bu gün?
O vaxt da inam var idi, indi də. Rahatlığım yoxdu.

- Azarkeşlərə hansısa sözünüz və ya istəyiniz var?
- Onlara ancaq təşəkkür edə bilərəm. Hansı dəqiqədə komandanın yanında olmaq lazımdı, çox yaxşı bilirlər. Mən onlara həmişə təşəkkür etmişəm. Çempionat oyununda az sayda olanda da onlara təşəkkür etmişəm.

- Nərimanın durumu nə yerdədi?
- Normallaşıb, tam hazır olmasa da, yaxşıdı.

- Hakim təyinatı barədə fikirləriniz?
- Mən tərəfdən narazılıq yoxdu. Belə hakimlərin Azərbaycana gəlməsi UEFA-nın Hakimlər Komitəsinin ciddiliyini göstərir. Məndə hansısa narahatlıq yoxdu. Hakimlər indi elə səviyyəyə gəlib çıxıb ki, belə fikirlərlə özümüzü yayındırmağa ehtiyac yoxdu.

- Üç il əvvəlki “Ferentsvaroş” daha güclü idi, yoxsa indiki? (macar jurnalistin sualı)
- Sizə də təşəkkür edirəm ki, burdasınız. Rəqibin gücünə gəldikdə, tam fərqli kollektivdi. Hər iki kollektivin öz gücü, fəlsəfəsi var. Çerçesovun vaxtında futbolçular başqa mentallıqda idi, indi başqa. Robi Kinin baş məşqçi olması bizim üçün motivasiya verir. Komanda indi daha çox qapıya yaxınlaşmaq istəyir, o vaxt fərqli idi. Hansı kollektivin daha güclü olduğunu desəm, qeyri-etik olar. Sabah qarşımızda çox güclü və istəkli kollektiv çıxacaq.

- Yeni transferin Bakıya gəldiyi deyilir. Doğrudu?
- Var, doğrudu (gülür).

Daha sonra Bəhlul Mustafazadə oyun haqda fikirləri bölüşüb: "Futbolçular olaraq oyunun mahiyyətini dərk edirik. Sabah ilk oyundan da daha çətin oyun bizi gözləyir. Əlimizdən gələni edəcəyik".

- Çempionlar Liqasının əsas mərhələsində oynaya bilərsən. Heç vaxt buna nail ola bilməmisən. Oyuna necə köklənmisən? Futbolda istək yaxşı şeydi, çox olanda alışıb yanmaq məsələsi var…
- İki dəfə bu mərhələdə oynayıb, keçə bilməmişəm. Artıq təcrübəm var. Bu dəfə daha soyuqqanlıyıq. Yaxşı oyun oynamağa çalışacağıq.

MÜZƏFFƏR QULUZADƏ