Matteus: “Mən də vaxtilə “Real”da oynamaq istəmişdim”

"Football-plus.az" xəbər verir ki, “Bavariya”da və Almaniya futbolunda yavaş-yavaş yeni bir gənc ulduzun yetişməsindən, yəqin ki, xəbərdarsız. Söhbət Lennart Karldan gedir. 2008-ci il təvəllüdlü bu futbolçunun 18 yaşı yalnız fevralın 22-də tamam olacaq. Həm fiziki göstəricilərinə (168 sm), həm solaxay olmasına, həm də oyun tərzinə görə Lionel Messiyə bənzədilən Karl artıq indidən bundesliqa və Çempionlar Liqasında qollar vurmağı bacarıb.

Yanvarın 4-də gənc istedad “Bavariya”nın rəsmi fanqrup üzvləri ilə görüş keçirərək onların suallarını cavablayıb. Həmin görüşdə fanatlardan biri futbolçuya “Bavariya”dan başqa şərəfini qorumaq arzusunda olduğun klub varmı” sualını ünvanlayıb. Karl bəlkə də cavabının nə ilə nəticələnəcəyini bilsəydi, həmin an tam başqa ifadə işlədərdi.

O, bu suala belə cavab verdi: “Bavariya” çox böyük klubdu və burda oynamaq hər kəsin arzusudu. Amma mən bir gün “Real”da oynamaq arzusu ilə yaşayıram. Ümid edirəm ki, bu söhbət bizim aramızda qalacaq”.

Məsələni zarafata salmaq istəməsinə və gülümsəməsinə baxmayaraq, bu söhbət onların arasında qalmadı. Olay ildırım sürəti ilə internetdə yayılmağa başladı. Təbii ki, bu sözlər “Bavariya” fanatlarının xoşuna gəlmədi, onlar sosial şəbəkələrdə gənc oyunçuya qarşı nalayiq, təhqiramiz şərhlər yazmağa başladılar. Məsələ o qədər ciddiləşdi ki, Karl bu açıqlamanın üzərindən 48 saat ötməmiş “instaqram”da şərh bölməsini bağlamalı oldu! Bu qalmaqalın fonunda sosial şəbəkələrdə Lennart Karlın 2018-ci ildə “Santyaqo Bernabeu”da “Real” forması ilə çəkdirdiyi şəkil paylaşılmağa başlandı. Sən demə, 10 yaşı olarkən Karl Madridə yollanaraq “Real”ın akademiyasında baxışdan keçibmiş. Amma o, həmin vaxt bəyənilməmiş və yalnız stadionda xatirə şəkili çəkdirməklə kifayətlənməli olmuşdu.

Təbii ki, Almaniya futbol ictimaiyyəti də bu məsələdən kənar qalmayıb. Bəziləri gənc futbolçunun tərəfini tutubsa, bəziləri bu açıqlamanı onun yaşı ilə əlaqələndirib.

Almaniya futbolunun fəsanəsi Lottar Matteusu dinləyək: “Bu açıqlamanın normal olduğunu düşünürəm. Bu sözlər onun nə qədər özünə güvəndiyini və ambisiyalı olduğunu göstərir. Mən də vaxtilə “Real”da oynamaq istəmişdim. Amma “İnter” məni buraxmamışdı. Bir futbolçu gələcəkdə başqa klubda oynamaq arzusunu dilə gətirirsə, bu, onun indiki klubuna hörmətsizlik kimi qiymətləndirilməməlidi”.

1970-ci illərin ortalarında “Real”da top qovmuş və öz dönəminin önəmli almaniyalı isimlərindən olan Günter Netser də Karlın sözlərinə pozitiv yanaşıb. O bildirib ki, bu, sadəcə, arzudu və gənc futbolçunun qarşısına belə hədəf qoyması təbiidi. Buna bənzər fikirləri “Real”a həm futbolçu, həm də baş məşqçi kimi xidmət etmiş tanınmış almaniyalı futbol adamı Bernd Şuster də dilə gətirib. Ancaq “Bavariya”nın idman direktoru Kristof Froynd Karlın yanlış anlaşıldığını və ertəsi komanda daxilində üzr istədiyini bilidrib. Digər idman direkotru Maks Eberl isə 17 yaşda bir futbolçunun bəzən səhvlər etməsinin normal olduğunu və Karlın səhvini anladığını deyib.

Maraqlıdı ki, Karl fanatlar arasında səsvermədə 45 faiz səs toplayıb və Harri Keyn ilə Maykl Oliseni qabaqlayaraq dekabrda “Bavariya”nın ən yaxşı futbolçusu seçilib. Ən son xəbərlərdə rəhbərliyin bu futbolçuya yeni müqavilə təklif etdiyi deyilir. Fevralda, yəni 18 yaşı tamam olandan sonra onun “rekordmayster”lə müqaviləsi avtomatik 2029-a qədər uzadılacaq. Amma “Bavariya” Karl ilə daha uzunmüddətli anlaşmaq və onun illik maaşını 5-8 milyon avroya qaldırmaq niyyətindədi. Bu futbolçu bu mövsüm iştirak etdiyi 22 rəsmi oyunda hesabına 6 qol, 2 məhsuldar ötürmə yazıb.