“Şəfa” ilə oyunu tez bitməsini istədik, ciddi zədələr ola bilərdi” – “İmişli” ətrafında nə baş verir?
Elitada çıxış edən bütün komandaların yoxlama oyunlarından xəbər tutmaq mümkündü, bircə “İmişli”dən başqa.
Klub ictimaiyyətə belə oyunlar haqda məlumat vermir. “Şimal”ın idman direkoru Elxan Yusifovla əlaqə saxladıqda təsadüfən xəbərimiz oldu ki, “İmişli” bu komanda ilə yoxlama oyunu keçirib. Məlum oldu ki, Aran təmsilçisi 1-ci liqa komandası ilə yanvarın 10-da Bakı Olimpiya Stadionunun ehtiyat meydançasında qarşılaşıb. Matç “pambıqçılar”ın 5:0 hesablı qələbəsi ilə yekunlaşıb.
“İmişli”nin oyunu gizli saxlaması, bu barədə ictimaiyyətə heç bir məlumat verməməsi isə müəmmalı məqamdı. Hətta belə informasiya da var ki, Jorj Kaşkilya “Şimal”la oyunda ölkəyə “Sumqayıt”ın prezidenti Riad Rəfiyevin əlaqələri vasitəsi ilə gələn 9 kolumbiyalını da sınaqdan keçirib. Bütün suallara cavab tapmaq üçün klubun icraçı direktoru Aqşin Mürsəlovla əlaqə saxladıq:
“9 futbolçunun gəlməsi yalan məlumatdı. Bunu etmək vəsait tələb edir. İki-üç futbolçu gəlmişdi. Baxışda oldular. İstəmədik ki, oyunlarımız verilsin. Sosial mediada da bununla bağlı paylaşım etmədik. İstədik ki, sakit şəraitdə keçsin. Zədəsiz olsun. Daha sonra “Şəfa” ilə oynadıq. Düzü, bir az gərginlik var idi. İstədik ki, oyun tez bitirilsin. Ciddi zədələr ola bilərdi. Çempionata hazır olmaq daha vacibdi, nəinki yoxlama görüşü. Futbolçuları tonusda saxlamaq üçün təktərəfli oyun oldu. Əsas futbolçuların formada qalmasıdı”.
MÜZƏFFƏR QULUZADƏ
Digər xəbərlər
