Sabah qış təlim-məşq toplanışının ikinci hissəsi üçün Türkiyənin Bələk bölgəsinə yollanacaq “Qarabağ” bu gün Qurban Qurbanovun iştirakıyla mətbuat konfransı keçirdi. Bununla mütəxəssis ictimaiyyəti maraqlandıran bir çox məsələyə aydınlıq gətirdi. Bilindi ki, “köhlən atlar”da qış “transfer pəncərəsi” çərçivəsində ayrılıq və yeni transfer ehtimalı zəifdi. Hər halda, çalışdırıcı hər mövqeyə yeni futbolçu arzulayır və ağdamlıların istəklərini reallaşdırmaq üçün vaxtı olacaq.

Bəs, mətbuat konfransından sonra keçirilən, ilk 15 dəqiqəsi açıq olan məşqdə nələr baş verdi?

Bildirək ki, “Qarabağ”ın əsas komandasının bütün üzvləri məşqdə idi. Komanda bu vaxt ərzində iki qrupa bölündü. Birində yerlilər, o birində legionerlər üstünlük təşkil edirdi. Futbolçular topla isinmə hərəkətləri edən zaman yetərincə istəkli və Qurban Qurbanov demişkən, gülərüz görünürdü. Düzü, Nəriman Axundzadə başqaları qədər fəal deyildi. Arabir komanda yoldaşlarıyla zarafatlaşsa da, bir qədər fikirli idi. Bizə elə gəldi ki, gənc hücumçu hələ “Ayaks”la matçdan sonra üzləşdiyi ictimai qınağın təzyiqindən tam qurtula bilməyib. Düzü, Mateus Silva da düşüncəliydi. Bəli, bu yaxınlarda onun da başqa klublardan təkliflər aldığı barədə xəbərlər yayılıb. Lakin “Qarabağ” bu heyəti qoruyub-saxlamaqda israrlıdı. Yəni braziliyalı müdafiəçi də mümkün qədər daha tez bu həqiqətlə barışmalıdı!

Qurban Qurbanov daha çox yerli oyunçularla vaxt keçirdi: onlarla söhbətləşdi, paslaşdı. Bəhlul Mustafazadə, Toral Bayramov, Elvin Cəfərquliyev, Abbas Hüseynov və Musa Qurbanlının kefi kök idi. 2023-cü ilin yayında “Qarabağ”dan ayrılan, “Buriram Yunayted” (Tayland), “Kocaelispor” (Türkiyə) və “Neftçi” macərasından sonra sabiq komandasına qayıdan Ramil Şeydayev də bura tam uyğunlaşıb.

Elə legionerlər də, xüsusən, Marko Yankoviç öz ampluasında idi. Düzdü, demək olar ki, bütün futbolçular daha çox maaş vədiylə təkliflər alıb. Ancaq onlar “Qarabağ”da xoşbəxtdi. Hələ aşağı yaş komandalarından cəlb edilən futbolçuları – Əli Bəşirovla Bəhruz Qurbanlını demirik. Onlar komanda yoldaşlarıyla yaxşı yola gedir. Mövsümün əvvəlində əsas komandaya qoşulan Hikmət Cəbrayılzadə də etimadı doğrultmağa çalışır.

Kəsəsi, “Azərsun Arena”nın ehtiyat meydançasında şahidlik etdiklərimiz “Ayntraxt”la matça görə narahatlığın yersiz olduğu qənaətini formalaşdırdı. Təki yanılmayım. Təbii ki, hələ qarşıda qardaş ölkədə keçiriləcək toplanış da var.

KƏNAN BAHADIR