“Seyxan müqavilə müddəti başa çatana qədər bizlə olacaq” – bombardirin premyer-liqa arzusu puç oldu
MOİK-in hücumçusu Seyxan Fərəcovun “İmişli”dən təklif aldığını, bəxtini premyer-liqada sınamaqda maraqlı olduğunu, lakin məxsus olduğu klubun bu məsələyə isti yanaşmadığını xəbər vermişdik.
Xatırladaq ki, “hərbçilər” Seyxanın yerinə alternativ futbolçu tapa bilməyəcəklərini və onunla müqavilə müddətinin hələ başa çatmadığını əsas gətirərək, bu keçiddən imtina edib.
Mövzu ilə bağlı MOİK-in baş məşqçisi İlham Yadullayevin də fikirlərini öyrəndik. Onun “Football-plus.az”a cavabı:
“Seyxanın klubumuzla müqaviləsi hələ qüvvədədi. Bu gün nəinki onun, hansısa futbolçunun komandadan göndərilməsi müzakirə olunmur. Qalan məsələlər isə klubdaxilidi. Bunu açıqlamağa ehtiyac yoxdu”.
İlham bəy başverənlərin “İmişli”nin formasını geymək istəyən Seyxanın psixoloji durumuna mənfi təsir edib-etməyəcəyi haqda bunları dedi:“Onun performans səviyyəsinin aşağı düşməsindən, psixoloji problem yaşamasından çəkinmirik. Ona görə ki, belə çatışmazlıq ortaya çıxmayacaq. Seyxan MOİK-in futbolçusudu və müqavilə müddəti başa çatana qədər bizlə olacaq. Bu barədə özü ilə danışmışıq”.
Xatırladaq ki, adı çəkilən futbolçunun MOİK-lə müqaviləsinin müddəti bu ilin yayında başa çatacaq.KƏNAN BAHADIR
Digər xəbərlər
