“Təəssüf ki, transferdə problemlər ortaya çıxıb. Çünki MOİK Seyxanı “İmişli”yə satmaq istəmir. Klubdan bildirilir ki, futbolçunun MOİK-lə bu ilin yayına qədər müqaviləsi var. Oyunçu qışda satılacağı təqdirdə alternativ tapmaq mümkün olmayacaq. Təbii ki, bu barədə qarşı tərəflə razıyıq. Özlərinə görə haqlı tərəfləri var. Amma söhbət azərbaycanlı futbolçunun taleyindən gedir. Seyxan bombardirdi. Xəyalları var. Onsuz da ölkəmizdə hücumçu qıtlığı hökm sürür. Seyxan istəyir ki, millidə forma geysin. 1-ci liqada çıxış etdiyinə görə xarici klublardan təklif almaq ehtimalı çox azdı. Bilindiyi kimi, 1-ci liqanın oyunları televiziyada yayınlanmır. Həmçinin “transfermarkt” portalında onun bu çempionatdakı uğurları göstərilmir. MOİK-in çempionluq şansı olsa, qarşı tərəfi daha anlayışla qarşılaya bilərdik. Lakin komanda lider “Şəfa”dan 16 xal geridədi. Özü də “İmişli” MOİK-ə lazımi səviyyədə ödəniş etmək istəyir. Bununla yanaşı, Seyxanın başqa kluba satışından MOİK-ə pay vermək variantı var. Lakin klub danışıqlara isti yanaşmır. Ümumiyyətlə, hansısa müzakirənin aparılması da mümkün görünmür. Syxan bu gün möhtəşəm formadadı. Öz üzərində çox çalışır. “İmişli”də uğurlu olması həm bu klub, həm MOİK, həm də Azərbaycan futbolu üçün qazancdı. Təəssüf ki, bu gün Seyxana həmin şans tanınmır. Halbuki millimizin baş məşqçisi Ayxan Abbasov bütün oyunçulara xüsusi yanaşır, izləyir. Futbolçumuz premyer-liqada olsa, daha çox iş görə bilər. Bu gün bizə kömək lazımdı. Futbolçu karyerası qısa olur”.