Vinisius Junior La Liqanın son turunda – “Sevilya” ilə oyunda “Real”ın start heyətində yer aldı, özü də kapitan sarğısı ilə.

"Football-plus.az" xəbər verir ki, bu məqama təəccüblənməyə dəyməz: braziliyalı vinger komandanın 4 kapitanından biridi.

Vini meydanda olduğu 83 dəqiqə ərzində ortabab oyun göstərdi: oyundaşlarını iki dəfə zərbə mövqeyinə çıxardı, 9 driblinq cəhdindən altısı uğurlu oldu, “çərçivə”yə bir zərbə vurdu. Meqaulduz statusu prizmasından baxanda elə də yaxşı statistika deyil.

Ən pisi isə odu ki, o, qol vurmağı yadırğayıb – son 17 oyunda fərqlənməyib. Sonuncu dəfə oktyabrın əvvəlində “Vilyarreal”la oyunda fərqlənib və dayanıb.
“Real” azarkeşləri də braziliyalının performansından məmnun deyil. 83-cü dəqiqədə Qonsalo Qarsiya ilə əvəzlənərkən “Santyaqo Bernabeu”nun dolu tribunaları onu fit səsi ilə yola saldı.

Vini oyunun gedişində azarkeşlərin səs-küyünə elə bir reaksiya verməsə də, oyundan sonra emosiyalarını gizlədə bilmədi: “instaqram” hesabından “Real” formasındakı şəklini çıxarıb yığma formasındakı şəklini qoydu, bundan başqa, çoxlu nöqtələrdən ibarət paylaşım etdi. Bu mesaj hər kəsə aydındı.

“Real”ın “Talavera”ya 3:2 qalib gəldiyi kubok oyunundan sonra da Vinisiusun adı arzuolunmaz şəkildə hallanırdı. İş ondadı ki, braziliyalı həmin oyunda ehtiyatda qaldı, amma meydan sahiblərinin 2-ci qolu vurduğu 91-ci dəqiqədə kədərlənmək əvəzinə Endriklə nə haqdasa danışır və gülürdü. Kameralar iki braziliyalının şənləndiyi anı tutmuşdu. “Real”dan heç kim bu olaya reaksiya vermədi.

İspaniya mediasının yazdığına görə, “Real” Vinisius ətrafındakı gərgin atmosferə görə çox narahatdı. Klub hələ ki futbolçunu dəstəkləyir, onun meydandakı inadkarlığını yüksək dəyərləndirir. Braziliyalı özü də optimal formadan uzaq olduğunu etiraf edir. Bəlkə də yanvara qədər olan məzuniyyət işə yarayacaq.

Vinisius “Real”la müddəti 2027-ci ildə başa çatacaq müqaviləni hələ də yeniləməyib. Tərəflər ortaq məxrəcə gəlməkdən çox uzaqdı. “The Athletic”in insayderi Mario Kortagena oktyabrda belə bir xəbər yaymışdı: vinger klub prezidenti Florentino Pereslə danışıb və bildirib ki, Xabi Alonso ilə münasibətləri tam korlanıb, indiki mərhələdə müqavilə müddətini uzatmağı düşünmür. Ancaq əsas məsələ baş məşqçi ilə bağlı deyil: “Real” Vinisiusa tələb etdiyi pulu vermək istəmir. Madrid nəhəngi braziliyalıya hər il üçün 20 milyon avro təklif edir, o isə 30 milyon istəyir.

Belə bir versiya da var idi ki, Vinisiusun agentləri “Real”ın Alonso ilə necə nəticə göstərəcəyini gözləmək üçün danışıqları bilərəkdən uzadır. Onlar bunun hesabına danışıqlarda üstünlük qazanmağa çalışacaqdı. Amma belə münasibət klubu əsəbləşdirir. Deyilənə görə, klub artıq yayda danışıqları dayandırıb. Madridli bosslar oyunçunun ötən mövsümündən narazıdı, danışıqlar masasına keçməmiş braziliyalının bir daha əvvəlki səviyyəyə dönüb-dönməyəcəyinə əmin olmaq istəyir.

Bu mövzuda daha bir yeni xəbəri nəzərinizə çatdırmaq istəyirik. Florentino Peres Vinisiusun klubdan ayrılmasında maraqlı deyil. Bu xəbəri “Radio Marca”ın efirində jurnalist Roberto Qomes yayıb. Onun dediyinə görə, klub prezidenti vingerin “Real”dan ayrılmasını istəmir, madridlilərin planı ondan ibarətdi ki, braziliyalı ilə müqavilənin müddəti mümkün qədər tez uzadılsın.