Çempionlar Liqasının “Atletik” - “Qarabağ” oyununun gedişində baş verən çoxsaylı insidentlərə görə UEFA Bilbao klubunu 10 min avro məbləğində cərimələyib.

"Football-plus az" xəbər verir ki, buna azarkeşlərin matç zamanı UEFA-nın İntizam Reqlamentinin 16(2)-ci maddəsinin tələblərinə əməl etməməsi səbəb olub.

Belə ki, “Atletik” “İdman tədbirinə uyğun olmayan mesajın ötürülməsinə” görə cəzalandırılıb. Jestlər, sözlər, əşyalar və ya siyasi, ideoloji, dini, təhqiramiz xarakter daşıyan istənilən digər vasitələrlə belə mesajların verilməsi qadağandı.

Xatırladaq ki, həmin matç zamanı "Atletik"in fanatları vaxtilə erməni separatçılarının Qarabağda yaratdıqları qondarma rejimin bayrağını qaldırmışdı. "Qarabağ" rəsmiləri isə həm oyundan əvvəl, həm də oyun zamanı şəhərdə baş verən təxribatlarla bağlı meydan sahiblərinə məlumat vermişdi.

“Qarabağ” - “Napoli” oyununun gedişində baş verən hadisələrə görə isə Neapol klubu cərimə ilə üzləşib. Neapol təmsilçisi ictimai keçidlərin bağlanmasına görə 12 min avro, azarkeşlərin atəşfəşanlıq etməsi səbəbindən 5250 avro cərimələnib.