Heç şübhəsiz, “Qarabağ”ın “Ayaks”a uduzması bu həftənin ən aktual mövzusudu. Futbol ictimaiyyəti, matçı izləyən yüzminlər – oyunu İTV-nin təkcə “yutub” kanalında 200 mindən çox adam canlı izləyirdi!– hazırda Qurban Qurbanovu və Nəriman Axundzadəni suçlayır. Baş məşqçini yanlış əvəzetmələrdə günahlandıranlar gənc hücumçunun da komandanı gücləndirmək əvəzinə zəiflətməsindən gileylənir. Təbii ki, sırf bu yöndə səslənə iradları haqlı saymaq olar. “Köhlən atlar”ın ilk qolunun müəllifi Kamilo Duran meydanı tərk etmək istəmirdi. Bunu onun təkcə qollarındakı bağcıqları yerə çırpmasından hiss etmək mümkün idi. Hələ onu demirik ki, sifəti zəhər tuluğuna çevrilmişdi... Elə Leandro Andradenin də daha bir neçə dəqiqə top qovmaq imkanının olduğu göz önündəydi. Təəssüf ki, xüsusən Aleksey Kaşukla Nəriman bu oyunda ümidləri doğrultmadı. Hətta Axundzadənin ayağı top tutmurdu desək, yanılmarıq. İzləyənlər gördü ki, Nəriman azı iki dəfə ona edilən ötürməni qəbul etməkdə çətinlik çəkdi. Daha doğrusu, topu dabanıyla özündən uzaqlaşdırdı.
Bəs “Qarabağ” həqiqətən məğlubiyyətə layiq idi? Qurban bəylə Nəriman bu tənqidləri haqq edirmi? Baş məşqçinin əvəzetmələrini necə əsaslandırmaq olar? Axı hazırda, demək olar ki, birmənalı fikir matçı məhz baş məşqçinin uduzmasıdı...
“Futbol+”in suallarını təcrübəsinə şəkk etmədiyimiz Ağasəlim Mircavadov cavabladı: “Qarabağ”ın bütün gücünü meydanda qoyduğuna şübhə yoxdu. Oyuna necə hazırlaşmışdılarsa, elə də oynadılar. Xatırlamıram ki, “Qarabağ” hansısa oyunda bu qədər qol vəziyyəti yaratsın. Birinci hissədə o qədər real qol fürsəti var idi ki... Təəssüf ki, “Qarabağ”da konkret hücum xətti yoxdu. Belədə Avropada uğur qazanmaq da yetərincə çətinləşir. “Qarabağ”a məhz belə məqamlar üçün hücumçu lazım idi. Orta xəttin yüksək keyfiyyətdə olması həmişə komandanın xeyrinə işləmir. İş ondadı ki, “Qarabağ”ın müdafiəçiləri belə hücumameyillidi. Sistem belədi. Hər şey baş məşqçidən asılıdı. Məncə, hesab 2:1 olanda müdafiə olunmaq yanlış addım sayılacaqdı. Bu komanda müdafiə olunmağı bacarmır... Həmçinin “Qarabağ” bütün qolları öz səhvi ucbatından buraxdı. Ardıcıl qol fürsətlərini əldən buraxmaq lazım deyildi... Ancaq həm də çempionatımızın səviyyəsini nəzərə almalıyıq. “Qarabağ” bu səhvləri premyer-liqada da edir. Sadəcə, rəqiblər bundan faydalana bilmir. Avropada isə səni bağışlamırlar. Əvəzetmələrə gəlincə, Qurban Qurbanov bu işləri çox görüb. Təəssüf ki, bu dəfə futbolçular oyun ritminə uyğunlaşa bilmədi. Daha diqqətli olmalıydılar. Və “Qarabağ”, təbii ki, tənqid olunmalıdı. Lakin söhbət tutarlı, düzgün tənqiddən gedir. Onu da deyim ki, ölkədə “Qarabağ”a təzyiq azdı. Premyer-liqadakı rəqiblər bu komandaya qarşı yaxşı çıxış edə bilmirlər. Bütün bu məqamların Avropa oyunlarında payı olur”.
KƏNAN BAHADIR