“Qarabağ” premyer-liqanın cari mövsümündə ən intizamlı komandadı.

Ağdam klubunun futbolçuları indiyə qədər bircə dəfə də meydandan qovulmayıb. “Qarabağ”la yanaşı, bir də “Karvan-Yevlax” və “Sabah” belə göstərici ilə öyünə bilər.

Sarı vərəqələrin sayına gəlincə, çempionla başqaları arasında açıq-aşkar uçurum var. “Qarabağ”ın oyunçuları “Zirə” ilə qarşılaşmaya qədər 13 sarı vərəqə görmüşdü. Bu gün isə birdən-birə üç futbolçu – Abdulla Zubir, Xoni Montiel və Marko Yankoviç eyni şəkildə cəzalandı. Həmişə təmkinli görünən kapitanın 86-cı dəqiqədə Hacıağa Hacılını itələyərək yerə sərdiyini gördüz?! Əcəba, bu qədər gərginliyin səbəbi nədi?

Oyunun məzmunundan danışmayacam. Amma görünən odu ki, Qurban Qurbanov 66-cı dəqiqədə Zubir, Cəfərquliyev, Addai və Axundzadəni oyuna qoşandan sonra da məzmun dəyişikliyinə nail ola bilmədi. Məni narahat edən bu heç-heçə yox, başqa məqamdı. “Qarabağ”ın məşqçi və oyunçu heyətinin indidən “Ayaks”la oyunun ab-havasına girdiyi açıq-aşkar görünür, hərəkət və davranışlardakı narahatlıq, əsəbilik və gərginliyin yeganə səbəbi budu. Yoxsa həmişəki “Zirə” idi də, nə olmuşdu ki...

Düzünü deyim ki, indiki durum məni əməllicə narahat edir. Əlbəttə, “Qarabağ” dekabrın 10-da taleyüklü oyun keçirəcək, Çempionlar Liqasında ilk 24 komanda arasına düşmək perspektivi məhz həmin qarşılaşmanın nəticəsindən asılıdı. Amma bunca gərgin olmağa nə hacət? Belə aşırı gərginliyin pis tərəfi – “yanmaq” ehtimalı da var.

Qalan dörd gündə Qurban bəyin qarşısında duran əsas vəzifə futbolçularını “zavod sazlamalarına qaytarmaqdı”. Yoxsa bu yükün, daha doğrusu, “Ayaks”la oyunun gərginliyinin altından çıxmaq çətin olacaq.

Mən yazdım, siz də bunu bir tərəfə qeyd edin. Həlledici anda gərgin olmaq səhv qərarlara, çox parlaq görünən pley-off perspektivini “baltalamağa” səbəb ola bilər. Sakitləşin, dostlar, sakitləşin! Bütün ölkə sizdən xoş xəbər gözləyir!

ORXAN