"Qarabağ" Misli premyer-liqasının 12-ci tur matçında "Sumqayıt"ın meydanından qələbəylə ayrıldı - 4:2.

"Football-plus.az" xəbər verir ki, "köhlən atlar"ın baş məşqçisi Qurban Qurbanov oyunsonrası mətbuat konfransında jurnalistlərin suallarını cavabladı.

- Futbolçularımı təbrik edirəm. Çox vacib 3 xal qazandıq. Fasilədən sonra komanda olaraq oyun ritmindən düşürük. Çox yaxşı, maraqlı oyun getdi. Qarşımızda da yaxşı rəqib var idi. Bu gün oyuna fərqli sistemdə başladılar. Biz fərqli hazırlaşmışdıq. Qarşımızda beşli müdafiə görəndə bəzi anlaşılmazlıqlar oldu. Amma get-gedə oyunu ələ ala bildik. Əsl futbol atmosferi var idi. Bütün azarkeşlərə təşəkkür edirəm. 

- "Sumqayıt"ın baş məşqçisi Saşa İliç deyəsən sizi təbrik etmədi. Oyundan sonra foyedə narazılıq da etdi.
- Təbrik etdi. Özü də dərhal gəldi.

- Xoni Montiel "Napoli" ilə oyuna hazırdı?
- İlk "11-lik"də onun üçün çətin olar. Bilirsiz ki, 1 ildən çoxdu start heyətində meydanda olmamışdı. Bir az narahatlıq var idi. Bəlkə də onu çox oynatdıq. Düşündük ki, fasilədə 15 dəqiqə istirahət edib bir az da oyunda olsa, pis olmaz. özünü yaxşı tərəfdən göstərdi. Ona öz idman formasını bərpa etmək üçün vaxt lazım olacaq. Ancaq "Napoli" ilə matçda Montieli meydanda görə bilərik. 

- Elvin Cəfərquliyevin start heyətində olmaması nə ilə bağlıdı?
- Sağlamlığı ilə. Bir neçə gün qızdırması oldu. Komanda ilə iki məşq edib. Bir az idman formasını itirib. Hazırda tam hazır deyil.

- Sizcə, "Sumqayıt"ın futbolçusuna verilən qırmızı vərəqə ağır qərar deyildi? Epizodu izlədiz?
- Ağır qərar ola bilər. Mən də videoya baxdım. Futbol kontakt oyunudu, aqressivlik olur. Hansısa epizodda emosiyalarını cilovlaya bilmirsən. Belə hallarda səhv qərarların olmamasının tərəfdarıyam. Bizə və ya rəqibə qarşı... Fərqi yoxdu... Ola bilər ki, səhv qərar idi, mən də bununla razılaşıram.

- Siz həmişə təmkininizlə nümunəvi mütəxəssis olmusuz. Lakin son zamanlar emonional reaksiyalar verirsiz. Bunun səbəbi nədi?
- Ümumiyyətlə emosional olmayan insan var? Yəqin ki, Mateus Silvaya sarı vərəqə verilən epizodu deyirsiz. Arada nəsə demək lazımdı. Oyunun əvvəlidi. Bəlkə sarı vərəqə var idi... Amma maraqlı olur. Arada hirslənmək lazımdı.

- Kaşuk qoldan sonra sanki axsayırdı. Zədəsi var?
- Soruşmadım. Deyəsən, ayağına zərbə olmuşdu.

- “Bu şəhərdə”nin konsertində sizi parodiya ediblər. Bu haqda nə deyə bilərsiz?
- Kiminsə işinə qarışmaq istəmirəm. Mən belə şeylərə çox baxmıram. Onlara uğurlar arzu edirəm.

- Kadi Borgesin yoxluğu “Napoli” ilə oyunda hiss olunacaq?
- Belə hallar olub. Əsas futbolçular bir çox oyunlarda iştirak etməyib. Amma uğurlu nəticələr əldə etmişik. Futbolçuların hamısı sağlam olanda hazırlıq çox yaxşı səviyyədə keçir, seçim imkanı çox olur. İstənilən oyunçunun yoxluğu təsirini göstərir.

- “Napoli” ilə oyunda start heyəti necə olacaq?
- Hər şey ola bilər. Qarşıdakı günlərdə fikirləşəcəyik.

- "Qarabağ"dan “Napoli” ilə oyunda sürpriz nəticə gözləmək olar?
- Hazırlaşırıq. Yaxşı mübarizə aparmağa çalışacağıq. Yaxşı nəticə əldə etməyi çox istəyirik.