Debütant yenə “Spartak”dan güclü oldu - İCMAL
Hesabat turu liderlər üçün uğurlu alındı.
"Football-plus.az" xəbər verir ki, şənbə günü üç oyun keçirildi.
“Akron”un 6 turluq məğlubiyyətsiz seriyasına autsayder son qoydu. Tura sonuncu pillədə daxil olan “Nijni Novqorod” gözlənilmədən Samarada qələbə qazandı. Ötən tur derbidə “Spartak”a uduzan ÇSKA “Orenburq”la ev oyununda sürprizə imkan vermədi. Komanda son 5 turda 4-cü qələbəsini qazandı. Özü də “hərbçilər” bu qələbələr zamanı qapını toxunulmaz saxlayıblar. Günün və turun ən böyük maraqla gözlənilən oyunu Kalininqradda keçirildi. Bu mövsümün əsas fenomeni sayılan debütant “Baltika”nın yüksəlişdə olan “Spartak”a qarşı necə təsir bağışlayacağı hər kəsə maraqlı idi. Moskva nəhəngi ilk dövrədə evdə bu rəqibdən 3 cavabsız top buraxdığına görə həm də qisas hissi ilə alışıb yanırdı.
Çox gərgin ab-havada keçən oyunun ilk yarısında mühüm olaylar yaşandı. Manelov 30-cu dəqiqədə kobud oyuna görə birbaşa qırmızı vərəqə alaraq meydan sahiblərini azlıqda qoydu. Emosiyalarına hakim ola bilməyəm “Baltika”nın baş məşqçisi Andrey Talalayev də hakimə ədəbsiz jest göstərdiyinə və ağzına gələni dediyinə görə tribunaya göndərildi. Amma “beton” müdafiəyə malik “Baltika” hətta bu şərtlərdə də qalib gəldi və üstəlik qol buraxmadı! 4 oyunluq qələbə seriyası qırılan “Spartak” müvəqqəti məşqçi Vadim Romanovun rəhbərliyi altında ilk dəfə uduzdu. “Baltika” turnirin tarixində “Spartak”ı mövsümün hər iki oyununda qol buraxmadan məğlub edən 2-ci debütant oldu!
İlk dəfə bunu 2003-cü ildə “Rubin” bacarmışdı (1:0, 2:0). 2024-ün mayında kubokdakı 1:0-lıq qələbəni də nəzərə alsaq, “Baltika” “Spartak”ı hətta ardıcıl 3-cü dəfə “quru” hesabla məğlub etdi. Maraqlısı odu ki, “Spartak” bu mövsüm “Baltika”dan başqa bütün rəqiblərə qol vurmağı bacarıb. Kalininqrad təmsilçisi 17-ci turda 11-ci dəfə qapısını toxunulmaz saxladı! Turnirin tarixində bundan daha yaxşı göstərici yalnız 2005-ci ildə qeydə alınıb. O vaxt “Lokomotiv” ilk 17 turun 13-də qol buraxmamışdı.
İlk dövrədə “Krılya Sovetov”u səfərdə 6:0 yenən son çempion “Krasnodar” bu dəfə bu rəqibə evdə 5 cavabsız qol vurdu və liderliyini davam etdirdi. Rusiya çempionatında bir mövsümdə bir komandanın bir rəqibi ümumilikdə 11-dən daha artıq top fərqi ilə yenməsi faktına yalnız bir dəfə rast gəlinib. 1998-də “Spartak” “Tümen”i 6:0 və 7:0 yenmişdi. “Lokomotiv” səfərdəki iki oyunluq qələbəsiz seriyaya Rostovda son qoydu. “Zenit” çətinliklə də olsa, “Rubin”i minimal hesabla məğlub etdi. Sankt-Peterburq nəhəngi 90 dəqiqə ərzində “çərçivə”yə cəmi 1 zərbə endirməklə 2017-nin yayından bu yana bu göstəricidə ən zəif oyununu keçirdi.
17-ci tur
Zenit – Rubin 1:0
Nino, 69.
Zenit: D.Adamov, Mantuan, Drkuşiç (Jerson, 61), Nino, Alip, Barrios, Vendel (Kassyera, 90+1), Qluşenkov (Yerakoviç, 84), Pedro Enrike, Mostovoy (Sobolev, 62), Luis Enrike (Yeroxin, 90+1).
Krasnodar – Krılya Sovetov 5:0
Auqusto, 21. Spertsyan, 40; 51-p. Kordoba, 61. Tormena, 90.
Krasnodar: Aqkatsev, Q.Qonsales, Tormena, Kosta (Jubal Junior, 46), Olasa, Krivtsov (Kozlov, 72), Auqusto (Lenini, 63), Batçi (Furtado, 73), Spertsyan, Sa (Perren, 63), Kordoba.
ÇSKA – Orenburq 2:0
Xotulev, 55-öz qapısına. Musayev, 83.
ÇSKA: Akinfeyev, Qayiç, Diveyev, Lukin, Moyzes, Kislyak, Oblyakov, Kruqovoy (Karmo, 87), Alves (Vilyaqra, 65), Qlebov (Viktor, 86), Popoviç (Musayev, 71).
Rostov – Lokomotiv 1:3
Vaxaniya, 20 – Barinov, 3. Komliçenko, 41-p. Nyamsi, 77.
Lokomotiv: Mitryuşkin, Silyanov, Nyamsi, Montes, Fasson, Karpukas, Barinov, Prutsev (Pinyayev, 74), Rudenko, Batrakov, Komliçenko (Vorobyev, 62).
Baltika – Spartak 1:0
Titkov, 62.
Spartak: Maksimenko, Denisov, Ciku, Vu, Litvinov (Zabolotnı, 75), Fernandeş, Barko, Umyarov, Dmitriyev, Markinyos, Solari.
Axmat – Dinamo M 2:1
Melkadze, 47. Ndonq, 84-p. – Nqamale, 26.
Akron – Nijni Novqorod 1:2
Dzyuba, 57 – Lesovoy, 15. Boselli, 33-p.
Soçi – Dinamo Mh 0:0
1. Krasnodar 17 11 4 2 34-10 37
3. Zenit 17 10 6 1 32-12 36
2. ÇSKA 17 11 3 3 28-14 36
4. Lokomotiv 17 9 7 1 35-21 34
5. Baltika 17 8 8 1 22-7 32
6. Spartak 17 8 4 5 25-22 28
7. Rubin 17 6 5 6 16-20 23
8. Akron 17 5 6 6 22-24 21
9. Dinamo M 17 5 5 7 26-25 20
10. Axmat 17 5 4 8 21-25 19
11. Rostov 17 4 6 7 13-20 18
12. Krılya Sovetov 17 4 5 8 20-31 17
13. Dinamo Mh 17 3 6 8 8-20 15
14. Orenburq 17 2 6 9 17-28 12
15. Nijni Novqorod 17 3 2 12 11-28 11
16. Soçi 17 2 3 12 14-37 9
Bombardirlər: Batrakov (Lokomotiv) – 10, Daku (Rubin) – 9, Xil (Baltika), Qluşenkov (Zenit), Spertsyan (Krasnodar) – 8.
Növbəti turun oyunları dekabrın 5-7-də keçiriləcək: Zenit – Akron, Soçi – Lokomotiv, Spartak – Dinamo M, Rostov – Rubin, Krasnodar – ÇSKA, Axmat – Orenburq, Baltika – Krılya Sovetov, Dinamo Mh – Nijni Novqorod.
Oyundan sonra
Andrey Talalayev,
“Baltika”nın baş məşqçisi: “Deməzdim ki, bu gün qeyri-adi bir uğur qazandıq. “Spartak”ı ilk dövrədə də məğlub etmişdik. Bu gün onları yenə məğlub etdik. Sadəcə bu dəfə qələbəni azlıqda qazandıq. Tam heyətlə oynayasaydıq, hesab arasındakı fərq daha böyük olardı. “Baltika” fenomeninin sirri nədədi? Mən heç bir fenomen görmürəm. Sadəcə həm futbolçular, həm məşqçilər korpusu, həm də klub üzərinə düşəni keyfiyyətli şəkildə yerinə yetirir, vəssalam”.
Vadim Romanov, “Spartak”ın müvəqqəti məşqçisi:
“Çox üzücü bir məğlubiyyətdi. Çünki əvvəldən sona qədər oyuna nəzarət etdik. “Baltika”nı yaxşı incələmişdik və necə oynayacaqlarını bilirdik. Bu gün oyunumuzda çatışmayan yeganə şey qol oldu. “Baltika”nın standart zərbələrdə təhlükəli olduğunu bilirdik. Yeganə bir epizodda boşluğa yol verdik və o da bizə baha başa gəldi. Rəqibin azlıqda qalması oyunun gedişatına və oyun planımıza təsir etmədi. Zatən onlar tam heyətlə oynayanda da üstünlük bizdə idi. Yeganə dəyişiklik onda oldu ki, “Baltika” bir qədər də geri çəkildi. Hakimlik və qırmızı vərəqə haqda heç nə deyə bilmərəm. Bir əvəzetmədən istifadə etməyimin səbəbi oyunumuzdan razı qalmağım idi. Meydanda gördüklərim məni qane edirdi. Bizə bu gün bitirici bir futbolçu çatışmadı. Buna görə də mərkəz hücumçusunu meydana buraxdım. Qalan aspektlərdə effektli idik”.
