Lionel Messi dünya futbolu tarixində yeni rekorda imza atıb. “İnter Mayami”nin hücumçusu karyerası ərzində ən çox məhsuldar ötürmə verən oyunçu olub!

"Football-plus.az" xəbər verir ki, Messinin komandası MLS-in pley-off mərhələsinin yarımfinalında “Nyu York Siti”ni 5:1 hesabıyla məğlub edib. Argentinalı hücumçu bir qol ötürməsi verərək pley-offdakı məhsuldar seriyasını 8 matça çatdırıb. Bu, Messinin parlaq karyerasında 405-ci qol ötürməsi kimi tarixə düşüb. O, bununla da əfsanəvi Ferents Puşkaş (404 assist) ilə bölüşdüyü dünya rekordunu yeniləyib.

38 yaşlı Messi indiyədək “Barselona”, PSJ və “İnter Mayami”nin heyətində çıxış edib, həmçinin Argentina yığmasındakı çıxışını davam etdirir. O, 2022-ci ildə dünya çempionu, 10 dəfə İspaniya çempionu, 2 dəfə Fransa çempionu, 2 dəfə Amerika Kubokunun qalibi, 2008-ci ildə Olimpiya çempionu, 4 dəfə Çempionlar Liqasının və 3 dəfə Klublararası Dünya Çempionatının qalibi olub.

Yeri gəlmişkən, Messinin Mar del Plata şəhərindəki heykəli vandallar tərəfindən zədələnib. Bu barədə “Ahora Mar del Plata” nəşri məlumat yayıb. Məlumata görə, El Nuevo Mundial kafesinin girişində yerləşən abidəyə naməlum şəxslər hücum edərək onu iki yerə bölüb. Heykəldə Messi Argentina yığmasının formasında, əllərində dünya çempionluğunun kuboku ilə əks olunmuşdu. Bu abidə 2022-ci ildə Qətərdə qazanılan dünya çempionluğuna həsr olunub.

Hazırda hadisənin detalları araşdırılır. Heykəlin bərpa olunub-olunmaması ilə bağlı qiymətləndirmə aparılacaq. Qeyd edək ki, bu, Messinin həmin heykəlinə ikinci dəfə edilən vandal hücumudu. 2024-cü ildə də başsız vəziyyətə salınmışdı.