Rəşad Sadıqov artıq deyinmək xatirinə deyinir
“Qəbələ”ilə oyundan sonra keçirilən mətbuat konfransında Rəşad Sadıqov giley-güzar edib. Komandanın bəxtsizliyindən, müəyyən qədər də haqsızlığa məruz qalmasından danışıb.
Dediklərinə nəzər salaq:
“Turan Tovuz" bir çox rəqabət apardığımız komandalarla Bakıda oynayıb. Bizi iki dəfə Tovuzda qəbul edəcək. "İmişli" bəzi komandalarla Şamaxıda oynadı, bizi Qubada qəbul etdi. "Kəpəz" Qəbələdə oynadı, fərqli ab-havada, azarkeşlərindən uzaq yerdə. İndi isə Yevlaxda oynayacaqlar. Dünən özümüz də gördük ki, "Kəpəz" orada istəkli idi, necə aqressiv oynayırdı. Burda söhbət sırf "Kəpəz", "İmişli" və "Turan Tovuz"dan getmir. Sadəcə, deyirəm ki, qaydalar qoyub elə riayət edək ki, qaydalar pozulmasın. Çünki bu, aşkar şəkildə rəqabətə təsir edir. Bir şey demirəm. Hansısa komanda zərurətdən stadionunu dəyişibsə, bütün rəqiblərini orda qəbul etsin. Üçüncü dövrədə isə dəyişərlər. Elə daha ədalətli olardı. Çox komanda "Kəpəz"lə Qəbələdə oynadı. Biz Yevlaxda oynamalıyıq. Gördük ki, "Kəpəz" Yevlaxda tam fərqlidi”.
Əvvəlcə onu deyir ki, “Kəpəz” Yevlaxda Qəbələ ilə müqayisədə daha aqressiv oynayırdı. Əvvəlcə bunu deyək ki, “Kəpəz” meydana tam qonaq qismində çıxmışdı. Aqressiv, daha yaxşı oynamalarının isə iki səbəbi var idi. Birincisi, “6 xallıq” oyun idi, qələbə gəncəlilərə hava-su kimi lazım idi. İkinci səbəb isə rəqibin çempionatdakı ən zəif komandalardan “Karvan-Yevlax” olması idi. Bu məsələyə başqa prizmadan da yanaşaq. Yevlaxın yolu Qəbələ ilə müqayisədə daha rahatdı, deməli, “Zirə” də az əziyyət çəkəcək. “Turan Tovuz”a gəlincə, qərblilərin mövsümün əvvəlində Tovuzda oynamayacağı əvvəldən bəlli idi. Bu isə hamıdan çox uzun illər kapitanı olduğunuz “Qarabağ”a sərf etdi. Səfər qarşılaşmasını evdə keçirdi. Amma nədənsə heç bundan danışmırsız. Sadıqov cənablarının giley-güzar etdiyi digər məqam isə olduqca absurddu:
“Kubokda ən çətin yol bizə düşüb. 1/8 finalda "Neftçi" ilə qarşılaşırıq, növbəti mərhələdə "Sumqayıt"la üz-üzə gələcəyik. İki ildi eyni ssenarini yaşayırıq. Yarımfinalda "Turan Tovuz" - "Araz-Naxçıvan", finalda da "Sabah" - "Qarabağ" cütünün qalibi ilə qarşılaşacağıq. Təbii ki, bunları ehtimal kimi deyirəm. Başqa komandalara hörmətsizlik olmasın”.
Sizin yolunuz çətindi, anladım. Amma kubokda asan yol olmur. Digər tor daha çətindi axı. “Neftçi”, “Turan Tovuz”, “Araz-Naxçıvan” daha çətindi, yoxsa son kubokun finalçıları “Sabah”la “Qarabağ”?
Sanki deyinmək xatirinə deyinirsiz. Gileyləndiyiniz haqlı məqamlar olub, amma son dediklərinizə heç cür haqq qazandırmaq olmur...
MÜZƏFFƏR QULUZADƏ
