Çempionlar Liqasında daha bir oyun həftəsi qaldı. Təbii, əvvəllər də bu turnirin oyunlarına həvəslə baxırdıq. Ona görə ki, komandaların göstərdiyi oyunun səviyyəsi yüksəkdi, meydana Avropanın top klubları, deməli, həm də dünya futbolunun ulduzları çıxır. Amma ÇL-in 2025/26 mövsümünü azərbaycanlı azarkeşlər üçün özəlləşdirən-gözəlləşdirən bir məqam var: “Qarabağ”ın varlığı!

5-ci oyun həftəsindən sonra artıq 5 komanda üçün “fatihə oxumaq” olar. Bunlar heç xalı olmayan “Ayaks”, 1 xala malik “Vilyarreal”la “Kayrat”, 2 xala malik “Olimpiakos”la “Bude/Qlimt”di. Deməli, növbəti mərhələdə oynamağa imkan verən 24 vəsiqə uğrunda 31 komanda mübarizə aparır. Nə xoş ki, həmin “31-lik”də “Qarabağ” da var. Azərbaycan çempionunun turnirin yazında olub-olmayacağı dekabrın 10-da – “Ayaks”ı qəbul edəcəyi gün bilinəcək. Bəli-bəli, məhz belə! Deyə bilərsiz ki, ondan sonra “Ayntraxt” və “Liverpul” ilə oyunlarımız da var. Mən xəyal-plov yeməyin tərəfdarı deyiləm, hansı vəziyyətdə olurlar-olsunlar, “böyük beşlik” ölkələrinin klubları ilə bacarmırıq. “Atletik” və “Napoli” ilə oyunların acı təcrübəsi də bunu göstərdi. Yaxşı, bəs “Çelsi” ilə oyundakı heç-heçəyə nə deyirsən, qocaman Huşəng?

Onu deyirəm ki, bu dəfə artıq heç-heçə də işə yaramayacaq, əziz oxucu! “Ayntraxt”dan ala biləcəyimiz 1 xalın canımıza faydası yoxdu. Deməli...
Deməli, necə olur-olsun, dekabrın 10-da “Ayaks”ı burda məğlub etmək lazımdı. Ən azı ona görə ki, Niderland nəhəngi bəlkə də tarixinin ən miskin dönəmini yaşayır. “Yəhudilər” çempionatda nəinki əbədi rəqibləri PSV ilə “Feyenoord”dan, hətta “Alkmaar”, “Neymegen” və “Utrext”dən də geridədi. Görün komanda nə gündədi ki, “sükan arxasına” keçməyə razılıq verən mütəxəssis tapılmır. Üstəlik “Ayaks”ı bu bazar onunla eyni xala malik olan “Qroningen”lə, Bakıya səfərdən dərhal sonra isə “Feyenoord”la oyun gözləyir. Üstəlik “Ayaks” üçün cari ÇL mövsümü bitib, yəni “Qarabağ”la oyunun heç bir turnir əhəmiyyəti yoxdu. Lap burda xal alsalar da belə, “Vilyarreal”la “Olimpiakos”a qalib gəlmələri çətin görünür. Üstəlik bizim, yəni “Qarabağ”ın bu komanda ilə köhnə haqq-hesabı var. Avropa Liqasının ötən mövsümündə - oktyabrın 24-də Bakıda qeydə alınan 0:3-ün dağı sinəmizdədi. Onda Julio Romao 15-ci dəqiqədə “qırmızı” almaqla “Qarabağ”ı böyrü üstə qoydu, sonda Elvin Cəfərquliyev də məğlubiyyətə “”töhfə verdi”.

Bütün bunları niyə xatırlatdığımı bilirsizmi? Demək istəyirəm ki, “Ayaks”ı udduq, udduq, udmadıqsa, bizim bu ÇL-də işimiz yoxdu.

...Amma adam belə möhtəşəm başlayan mövsümün acınacaqlı şəkildə bitməsini heç istəmir, qətiyyən istəmir! Ürəyimiz dözməyəcək e...

HUŞƏNG