“Düşünürəm ki, bütün dünyada, hətta ən kiçik adada da məni daha çox tanıyırlar”
“Əl-Nəssr”in hücumçusu Kriştiano Ronaldo ABŞ prezidenti Donald Trampla görüşüb.
"Football-plus.az" xəbər verir ki, bu görüş Səudiyyə Ərəbistanının vəliəhd şahzadəsi Məhəmməd ibn Salman Əl-Səudun Birləşmiş Ştatlara səfəri şərəfinə təşkil olunan axşam yeməyində gerçəkləşib.
“Oğlum indi atasına daha çox hörmət edir”
Tədbirdə, demək olar ki, Amerikanın bütün bomondu iştirak edib. Görkəmli qonaqlar arasında dövlət katibi Marko Rubio və vitse-prezident Cey Di Vens, ticarət naziri Hovard Lütnik, FİFA prezidenti Canni İnfantino, həmçinin Tim Kuk, İlon Mask, Ceff Bezos və Devid Saks da olub. Sonunсu Ronaldo ilə məhz portuqaliyalının çəkdiyi selfini də yayıb.
Kriştiano Trampdan çoxlu xoş söz eşidib. Prezident futbolçunu oğlu ilə tanış etdiyini də bildirib:
“Burda dünya liderlərinin bir çoxu toplaşıb – ulduzlar, idmançılar... Oğlun Ronaldonun böyük fanatıdı. Berron onunla tanış ola bildi, düşünürəm ki, o, indi atasına bir qədər daha çox hörmət edir. Sadəcə, ona görə ki, mən onları bir-biri ilə tanış etdim”.
Ronaldo sosial şəbəkə hesabında görüşü belə şərh edib:
“Təşəkkür edirəm, cənab Prezident, dəvətinizə və mənə, eləcə də gələcək həyat yoldaşım Corcinaya göstərdiyiz isti qəbula görə. Hər birimiz dünya üçün anlamlı bir şey edə bilərik və mən cəsarət, məsuliyyət və davamlı sülh üzərində qurulan gələcək üçün yeni nəsillərə ilham verməyə hazıram”.
Yeri gəlmişkən, Ronaldo bir müddət əvvəl Pirs Morqana verdiyi müsahibədə Trampla ünsiyyətdə olmaq arzusunu gizlətməmişdi. Futbolçu ABŞ prezidentini dünyanı dəyişməyə qadir olan şəxs adlandırmış, ortaq cizgiləri haqda danışmışdı. Kriştiano özünün prezidentdən daha çox tanındığını da bildirmişdi:
“Düşünürəm ki, bütün dünyada, hətta ən kiçik adada da məni daha çox tanıyırlar”.
Hücumçu iyunda Trampa Portuqaliya yığmasının üzərində avtoqrafı olan və “Sülh üçün oynayırıq” yazılan formasını da göndərmişdi. Tramp isə bu görüşdə futbolçuya Ağ Evin açarını bağışlayıb.
Səfərin pərdəarxası
Amerika mediası bunun Ronaldonun 2017-ci ildən bəri ABŞ-yə ilk səfəri olduğunu xüsusi vurğulayır. Ulduz forvard model Ketrin Mayorqanı zorlamasıyla bağlı ittihamlar üzündən uzun müddət idi bu ölkəyə səfərdən qaçırdı. Guya bu insident 2009-cu ildə Las-Veqasda baş verib. Futbolçu özü ittihamı rədd edir.
Nə qədər qəribə olsa da, şam yeməyində əsas diqqət Ronaldoya yox, şeyx Salmana yönəlib. Bu, jurnalist Camal Qaşıqçının 2018-ci ildəki qətli ilə bağlı yaranan diplomatik qalmaqaldan sonra Səudiyyə Ərəbistanının vəliəhd şahzadəsinin ABŞ-yə ilk səfəridi.
Xatırladaq ki, Salmanın qatı tənqidçisi kimi tanınan Qaşıqçı Səudiyyə Ərəbistanının İstanbuldakı səfirliyinin ərazisində amansızcasına qətlə yetirilib, onun cəsədi hissələrə bölünərək səfirlik ərazisindən çıxarılıb. Amerika kəşfiyyatının məlumatına görə, şeyx Salman əməliyyata xeyir-dua verib, baxmayaraq ki, hər şeyi inkar edir.
Hazırda ABŞ ilə Səudiyyə Ərəbistanı arasındakı gərginlik aradan qalxıb. Elə bu səfər vaxtı da reportyorlar Qaşıqçı mövzusunu yada salanda Tramp Salmanı müdafiə edib:
“Birmənalı qiymətləndirilməyən adamı xatırladırsız. Haqqında danışdığınız cənab çoxlarının xoşuna gəlmirdi. Hər şey olur. Ancaq şeyx Salmanın bununla bağlı heç nədən xəbəri yoxdu. Qonaqlarımızı çətin vəziyyətdə qoymağınıza dəyməz”.
Şeyx Salman özü başverənləri faciə və səhv adlandırıb, onu da deyib ki, bir daha belə hadisənin təkrarlanmaması üçün tədbirlər görülüb.
Görüşün yekunu
Səudiyyə Ərəbistanının nümayəndə heyətinin səfəri uğurlu olub: tərəflər müdafiə sahəsində əməkdaşlıqla bağlı müqavilə imzalayıb, həmçinin ərəblərin Amerika iqtisadiyyatına trilyon dollar investisiya yatırması ilə bağlı razılığa gəlib.
Şeyx Salman futbola fəal şəkildə yatırım etməsi ilə də tanınır. Onun nəzarət etdiyi Səudiyyə Ərəbistanının Suveren fondu Pro-liqa komandalarına, o cümlədən Ronaldonun şərəfini qoruduğu “Əl-Nəssr”ə də sponsorluq edir, 2023-cü ildə isə “Nyukasl”ı alıb. Şeyxin canfəşanlığı Səudiyyə Ərəbistanının 2034-cü ildə keçiriləcək dünya çempionatının təşkilatçılığı uğrunda mübarizədən qalib ayrılmasına səbəb olub. Ronaldo da bu ölkənin sifariş ərəfəsini fəal şəkildə dəstəkləyib, bu məqam isə futbolçu ilə vəliəhd şahzadə arasındakı xoş münasibətlərdən xəbər verir.
Digər xəbərlər
