Dünya futbolunda son 15 ilin ən önəmli mərkəz hücumçularından biri olan Robert Levandovski ilə bağlı çox maraqlı bir iddia ortaya atılıb.

"Football-plus.az" xəbər verir ki, polşalı forvard 2022-ci ildə ''Bavariya''nı tərk edərək 45 milyon avroya ''Barselona''ya yollandı. Leva bu pula layiq olduğunu artıq sübut edib. O, Kataloniya nəhəngində 158 rəsmi oyuna 109 qol vurub.

Polşalı jurnalist Sebastyan Staşevskinin paylaşdığı xəbər isə futbol dünyasında maraqla qarşılanıb. İki klub arasındakı anlaşmaya əsasən Levandovski ilk mövsümdə La Liqada 25 qol vuracağı təqdirdə ''Barselona'' ''Bavariya''ya 2,5 milyon avro bonus ödəməli olacaqdı. Staşevskinin sözlərinə görə İspaniyadakı ilk mövsümündə Leva La Liqada 23 qol həddinə çatdıqdan sonra ''Barsa'' rəhbərliyi bonus ödəməmək üçün ondan qalan oyunlarda qol vurmamağı xaiş edibmiş!

İddialara görə Levandovski prezident Joan Laportanın bu istəyi qarşısında həmin vaxt böyük şok yaşamışdı. O həqiqətən də mövsümün son iki oyununda qol vurmadı və 2022/23-ü La Liqada 23 qolla tamamladı.

Hələlik ''Barsa''dan bu iddiaya heç kim cavab verməyib. Bir şey dəqiqdi ki, həmin dönəmdə ''blauqrana'' ciddi maddi sıxıntılar yaşayırdı.