Avropanın idman mediasında qəribə məzmunlu xəbərlər yayılıb.

"Football-plus.az" xəbər verir ki, “Barselona”nın baş məşqçisi Hans-Diter Flik sentyabrdan bəri məşqçi korpusuna burdan ayrılmaq arzusunu çatdırmaqdadı.

60 yaşlı almaniyakı mütəxəssis hələ ki bu fikri nə idman direktoru Dekuya, nə də prezident Xuan Laportaya çatdırıb. Ancaq indiki durumu köməkçiləri, analitikləri və başqa əməkdaşlar ilə müzakirə edib. Flik oyunçuların əhval-ruhiyyəsinə və klub rəhbərliyinin dəstəyinin yoxluğuna görə məyus olduğunu etiraf edib. Belədə ortaya haqlı sual çıxır: Fliki narazı salan nədi?

AS nəşrinin yazdığına inansaq, Flik üçün konkret nəticələr problem deyil, bunlar yalnız simptomdu. Onu futbolçuların lazımi dərəcədə can qoymaması qıcıqlandırır. Futbolçular gündəlik əməyə dəyər vermək, intizam prinsiplərinə hörmət etmək hissini itirib. Hans-Diter dəfələrlə xəbərdarlıq edib ki, eqo komanda uğurlarını dağıdır, indi isə belə hesab edir ki, “Barsa” məhz bu problemi yaşayır: hər kəs kollektivin maraqlarını düşünmədən özü üçün oynayır.

Narazılığın mərkəzində dayanan fiqur 18 yaşlı Lamin Yamaldı. Baş məşqçinin fikrincə, klub ona hədsiz sərbəstlik verir. Məsələn, “el klasiko”dakı məğlubiyyətdən sonra gənc istedad komanda ilə birgə evə qayıtmaq əvəzinə Milana uçub. Səfərlər vaxtı gənc ispaniyalı kollektivdəki yeganə şəxsdi ki, özü yemək arxasınca getmir, yeməyin masasına qoyulmasını gözləyir. Laminin davranışındakı nöqsanları göstərən başqa detallar da var. Klubun bazasında əməkdaşlar və prezident üçün nəzərdə tutulan dörd elektrokar var. Oyunçulara həmin maşınlardan istifadə etmək qadağan olunsa da, Lamin əyləncə xatirinə hara gəldi şütüyür.

Reklam və sponsorluq öhdəlikləri ilə bağlı sıx qrafik də əlavə problemlər yaradır. Vinger İspaniya yığmasının düşərgəsində zədəli olanda xəstəxanaya yollanmaq əvəzinə saatlar ərzində hansısa reklam çarxına çəkilib. “El Klasiko”dan bir neçə gün əvvəl isə “Kings League” (media futbol turniri) tədbirində iştirak edib. Yamal ötən mövsümdəki kimi parlaq oyun göstərsəydi, bəlkə də bütün bu sadaladığımız məqamlar Fliki az qıcıqlandırardı.

Məşqçi korpusunun fikrincə, zərbə və ya toqquşma ilə bağlı olmayan qasıq zədəsi də Yamalın komanda işlərindən kənar düşməsinin nəticəsidi. Demək olar ki, hər həftə Laminlə bağlı hansısa qalmaqal baş verir – məsələn, yaxınlarda qız dostu Nikki Nikolla vidalaşdı. “Barsa”nın baş məşqçisi faktiki hər mətbuat konfransında onunla bağlı suallara cavab verməyə məcbur olur. Flik dəfələrlə narazılığını nəinki məşqçi korpusuna, prezidentin ətrafına – mətbuat xidmətinin rəhbəri Qabriel Martinesə və Laportanın sağ əli Alexandro Eçevarriyaya çatdırıb.
Fliklə Laporta arasındakı söhbətlər qarşılıqlı hörmət ruhunda olur. Baş məşqçi gündəlik işlə bağlı məsələləri əsasən Deku və Eçevarriya ilə müzakirə edir. Alman mütəxəssis bu şəxslərlə dostcasına münasibətlər qursa da, Yamal mövzusunda konseptual fikir ayrılıqları var.

Flik sərt intizam tərəfdarıdı. PSJ-nin baş məşqçisi vaxtilə Usman Dembele ilə necə davrandısa, o tərbiyəvi işin nəticəsi kimi “Qızıl top”u da qazandı. “Barsa” rəhbərliyi isə daha yumşaq yanaşmaya üstünlük verir. Yadınızdadısa, sabiq prezident Jozep Bartomeunun dönəmində klub Luis Enrike ilə münaqişədə Lionel Messinin tərəfini tutmuşdu. Bu üzdən Laminə səhərə qədər şənliklərdə iştirak etməyə icazə verilməsi, qızlarla görüşə uçması, qolf-karla şütüməsi, yeməyi masanın üzərinə gətirilən yeganə futbolçu olması təəccüb doğurmur. Klub belə hesab edir ki, bütün bunlar yeniyetmə ulduzun üzərindən gərginliyi atmağa xidmət edir.

Onu da xatırladaq ki, Flik 2024-cü ilin mayından kataloniyalılara rəhbərlik edir. Onun klubla müqaviləsinin müddəti 2026-cı ilin iyununa qədər idi. Bu ilin mayında alman mütəxəssislə müqavilənin müddəti 2027-nin yayına qədər uzadılıb.