Milli komandamız sabah DÇ-2026-ın seçmə mərhələsində sonuncu sınağına çıxır. Rəqib isə son iki dünya çempionatının finalçısı Fransadı.

Fransa Futbol Federasiyası artıq Kilian Mbappe, Eduardo Kamavinqa və Manu Konenin zədə səbəbindən Bakıdakı oyunu buraxacağını açıqlayıb. Bəs bu futbolçuların yoxluğu millimiz üçün nə dərəcədə sərfəlidi?

Konedən başlayaq. “Roma”da parlaq mövsüm keçirən 24 yaşlı yarımmüdafiəçi artıq milliyə də çağrılır. Atletik oyunu ilə fərqlənən Kone Ukrayna ilə matçda Menyandan sonra ən aşağı reytinq alan futbolçu olub.

Kamavinqadan isə danışmağa ehtiyac yoxdu. Üç mövsümdü yığmanın və “Real”ın əvəzedilməzlərindəndi. Universallığı ilə seçilən Eduardonun yoxluğunun millimizə xeyri dəyə bilər. Amma bir məqam var. Nqolo Kante nə zədəlidi, nə də cəzalı. Səudiyyə Ərəbistanı çempionatında oynasa da, gücünü, əzəmətini itirməyib, Ukrayna ilə oyunun ən yaxşılarından idi. Kantedən başqa PSJ-nin oyunçusu Zair-Emeri də var ki, Kamavinqanın yerini doldura bilər.

Və Kilian Mbappe. Belə futbolçunu Bakıda görmək xoş olardı. Amma meydanda yox. Bizim üçün Mbappeli Fransa yaxşıdı, Mbappesiz Fransa daha yaxşıdı. Parisdəki matçda da ilk hissənin sonunda komandamızın xal ümidini məhz o öldürmüşdü. Amma istər hücumun solunda, istərsə də mərkəzində onu əvəzləyəcək xeyli futbolçu var. Premyer-liqada özünü yaxşı göstərən Mateta, Ekitike və PSJ-nin ulduzu Barkolya kimi futbolçular var.

Bir sözlə, Fransanın heyətində nə qədər futbolçu zədələnsə də, onları əvəzləməyə adam tapılar. Dərd bizim dərddi e…

MÜZƏFFƏR QULUZADƏ