“Təsbehli hoca, göstər hünərini!” deyib qaş düzəltməsini istədik, vurdu göz çıxardı. Bəli-bəli, “Turan Tovuz”un baş məşqçisi Kurban Berdıyevi nəzərdə tuturam.

İnsafən, həmin yazı saytımızda yer alandan sonra işlər bir qədər qaydasına düşdü. “Bozqurd” Misli premyer-liqasının evdə keçirilən 30-cu tur matçında “Sabah”ı məğlub etməklə 5 oyunluq “qələbə orucunu açdı” və bununla 4-cü pillədəki yerini möhkəmlətdi. İş ondadı ki, Berdıyevin komandası üçün 4-cü yox, 3-cü yer daha vacibdi. Sadəcə, mütəxəssis elə “bayquşlar”la oyunda ona sarı vərəqə göstərən Elçin Məsiyevi təhqir etdiyinə görə üçü şərti olmaqla 5 oyunluq cəzalandı və komanda yenə xal itkilərini sıralamağa başladı. Axı biz dilin hünərindən danışmamışdıq, Berdıyev...

Hər halda, baş məşqçinin cəzasının əsas hissəsi arxada qalıb. “Araz-Naxçıvan” və “Şamaxı” ilə oyunlarda xeyli narahat görünən çalışdırıcı qalan oyunlarda ehtiyat oyunçular skamyasında əyləşə biləcək. İndi başlıca məqsəd Muxtar Respublika təmsilçisini qabaqlamaqdı. Yəqin ki, Berdıyev işini şansa buraxmaq istəməz. Kollektiv mövsümü ilk “üçlük”də bitirməsə, avrokuboklara yollanmaq hədəfi azarkeşlərdən asılı olacaq. Belədə gərək 4 minə yaxın tovuzlu azarkeş ölkə kubokunun final matçını izləmək üçün Mehdi Hüseynzadə adına Sumqayıt şəhər stadionuna yollana və “Qarabağ”ı qələbəyə səsləyə. Bəlkə onda avrokubokların qapısı “bozqurd”un üzünə yenidən açıla...

KƏNAN BAHADIR