Bu gün və sabah futbol üzrə ölkə çempionatının 1-ci liqasında 7-ci turun oyunları keçiriləcək. Bütün görüşlər PFL-in "1-ci liqa/2-ci liqa" "yutub" kanalında canlı yayınlanacaq.

İlk gündə üç matça şahidlik edəcəyik. "Baku Sportinq"in "Cəbrayıl"ı qəbul edəcəyi oyunda üstün olacağını proqnozlaşdıra bilərik. Ona görə ki, indiyə qədər qənaətbəxş nəticələr qazanan Buzovna təmsilçisi ilk "dördlük"dəki yerini qorumağa çalışacaq. Ancaq qonaqlar da azı bir xal uğrunda mübarizədən qopmamalıdı. Axı hələ 1-ci liqada qalmaq istəyən "Cəbrayıl"ın arxayınlaşması üçün tezdi.

Turun mərkəzi oyunu Mingəçevirdə keçiriləcək. Burda bölgənin eyniadlı təmsilçisi "Şəfa" ilə üz-üzə gələcək. Hər iki komandanın çempionluğa iddiası şübhə doğurmur. Bəli, "doğma divarlar" və azarkeş amili meydan sahiblərindən yana ola bilər. Lakin hələ məğlubiyyət üzü görməyən "Şəfa"nın liderliyini qorumaq üçün "dəridən-qabıqdan çıxacağına" şübhə yoxdu. Odu ki, mingəçevirli futbolsevərlərin tribunalara təşrif buyurmasında fayda var. Axı sevimli komandalarının mümkün xal itkisi "nur şəhəri"nin təmsilçisinin çempionluq ehtimalını xeyli azaldacaq... Bizdən demək... Növbəti oyunda "Səbail" evdə MOİK-i sınağa çəkəcək. İkinci pillədə qərarlaşan Bayıl təmsilçisi "Şəfa" ilə aradakı xal fərqinin artmasına imkan verməməlidi. "Dənizçilər" liderin Mingəçevirdə büdrəmə ehtimalını nəzər almalı, meydana yalnız MOİK-i məğlub etmək üçün çıxmalıdı. İş ondadı ki, "hərbçilər"in də durumu qənaətbəxş deyil. Uğursuz mövsüm keçirən kollektivin xala hava-su kimi ehtiyacı var...

Noyabrın 6-da izləyəcəyimiz görüşlərə gəlincə, "Şahdağ Qusar" "Şimal"ı, "Difai" "Zaqatala"nı qəbul edəcək. Bəli, Qusar təmsilçisi rəqibindən üstündü. Ancaq meydan sahibləri "doğma divarlar" arasında asan qələbə qazanacağını düşünə bilməz. Çünki itirəcək heç nəyi olmayan xaçmazlılar "zirzəmi"dən xilas olmaq üçün sona qədər döyüşməkdən çəkinməyəcək. Bununla belə, Ağsu təmsilçisinin "Zaqatala"nın öhdəsindən gəlmək ehtimalı azdı. "Difai" bu matçda “boyundan yuxarı tullanmağa” cəhd etməli olacaq. Qonaqlar isə xal ehtiyatını artırmaqla mövqeyini yaxşılaşdırmağın yollarını axtaracaq.

5 noyabr
Baku Sportinq – Cəbrayıl 2:0
Ceyhun Muxtarlı, 37. Elvin Valiiev, 61.
Buzovna, qəsəbə stadionu. Saat 14.00.

Mingəçevir – Şəfa 2:3
Seymur Məmmədov, 32. Kennet Kalunqa, 80 - Pərviz Azadov, 35. Tərlan Quliyev, 45+2-p. Amir Ebrahimzade, 90+1
Mingəçevir, Yusif Məmmədzadə adına şəhər stadionu (ehtiyat meydança). Saat 14.00.

Səbail – MOİK 1:0
Tuqay Əlizadə, 31
Bakı, "ASCO Arena". Saat 15.00.

6 noyabr
Şahdağ Qusar – Şimal
Şamaxı, Olimpiya İdman Kompleksinin stadionu. Saat 14.00.

Difai – Zaqatala
Ağsu, şəhər stadionu. Saat 14.00.

Xal durumu: Şəfa - 19, Səbail - 14, Mingəçevir - 13, Baku Sportinq - 12, Şahdağ Qusar, Zaqatala - 7, Cəbrayıl - 6, MOİK - 5, Difai - 4, Şimal - 2.

Bombardir: Seyxan Fərəcov (MOİK).

KƏNAN BAHADIR