“Şəfa” zirvədə qaldı, “Şimal” “zirzəmi”yə endi... - ŞƏRH
Oktyabrın 22-23-də keçirilən oyunlarla futbol üzrə ölkə çempionatının 1-ci liqasında 6-cı tur da geridə qaldı.
Məlum olduğu kimi, turun ən maraqlı matçlarından biri Şamaxıda keçirildi. Burda “Difai”ni qəbul edən “Şimal” böyükhesablı məğlubiyyətlə üzləşdi və Ağsu təmsilçisi sonuncu pillədən xilas oldu. Autsayderlərin duelindən əli ətəyindən uzun ayrılan xaçmazlılar isə “zirzəmi”nin yeni sakininə çevrildi.
Növbəti qarşılaşmada MOİK-lə “Baku Sportinq” üz-üzə gəldi. Komandalar qol səsi eşidilməyən matçda hərəyə bir xal qazandı. O başqa məsələ ki, “hərbçilər” rəqibinin azlıqda qalmasından faydalana bilmədiyindən “sülh”ə görə məyus oldu. “Cəbrayıl” – “Şahdağ Qusar” görüşü qarabağlıların hər iki hissədə göstərdiyi üstün oyunla yadda qaldı. Meydan sahibləri inamlı çıxışla haqq etdiyi xalları hesabına yazrmaqla təhlükəli zonadan bir qədər də uzaqlaşdı. “Zaqatala” – “Mingəçevir” oyunu Rüstəm Məmmədovun komandasının ənənəsinə sadiq qaldığını – iddialı rəqiblərə başağrısı olmağa davam etdiyini, edəcəyini sübuta yetirdi. Çempionluq uğrunda mübarizə aparan “nur şəhəri”nin təmsilçisi qələbə qolunu 73-cü dəqiqədə - aramsız hücumlardan sonra vura bildi. Hər halda, “Mingəçevir” hədəfə çatmaq istəyirsə, daha yaxşısına ehtiyac var...
Tura çoxdan maraqla gözlənilən paytaxt derbisiylə - “Şəfa” – “Səbail” oyunuyla yekun vuruldu. Çempion olmaq istəyən komandaların duelində qalib müəyyənləşmədi. Hər halda, heç-heçə “Şəfa”ya daha çox sərf etdi. Axı bu komanda zirvədəki yerini qorudu. Maraq üçün qeyd edək ki, bu turda ən az tamaşaçı “Şimal”la “Cəbrayıl”ın (20), ən çox azarkeş isə “Şəfa”nın (500) ev oyununda toplaşdı.
1. Şəfa 6 5 1 0 17-4 16
2. Səbail 6 4 2 0 9-3 14
3. Mingəçevir 6 4 1 1 11-6 13
4. Baku Sportinq 6 2 3 1 11-8 9
5. Şahdağ Qusar 6 2 1 3 7-10 7
6. Zaqatala 6 2 1 3 5-9 7
7. Cəbrayıl 6 2 0 4 9-12 6
8. MOİK 6 1 2 3 7-9 5
9. Difai 6 1 1 4 8-13 4
10. Şimal 6 0 2 4 4-14 2
Bombardir: Seyxan Fərəcov (MOİK) – 5.
Növbəti turun oyunları noyabrın 5-6-da keçiriləcək: Baku Sportinq – Cəbrayıl, Mingəçevir – Şəfa, Səbail – MOİK, Difai – Zaqatala, Şahdağ Qusar – Şimal.
KƏNAN BAHADIR
