Bu gün futbol üzrə ölkə çempionatının 1-ci liqasında 4-cü tura start veriləcək.

"Football-plus.az" xəbər verir ki, üç gün ərzində keçiriləcək oyunlar PFL-in “1-ci liqa//2-ci liqa” “yutub” kanalında canlı yayınlanacaq.

İlk oyunda “Şahdağ Qusar” “Mingəçevir”i qəbul edəcək. Məlum olduğu kimi, Qusar təmsilçisi hələ çempionatda möhkəmlənməkdə, rəqiblərinə “dişini göstərməkdə” çətinlik çəkir. Bu üzdən ortabablar sırasında qərarlaşan komanda istəyinə nail olmaq üçün çempionluğa iddialı “Mingəçevir”dən azı bir xal qoparmalıdı. O başqa məsələ ki, “nur şəhəri”nin təmsilçisinin buna imkan verəcəyini proqnozlaşdırmaq məntiqəuyğun deyil. Azı ona görə ki, xal itkisi qələbələri sıralayan “Şəfa” və “Səbail” üçün göydəndüşmə fürsət olacaq. Belədə onsuz da ilk turda “dənizçilər”ə uduzan “Mingəçevir”in işi bir qədər də çətinləşəcək.

Bayıl təmsilçisi bu turda autsayderlər sırasında qərarlaşan “Şimal”ın qonağı olacaq. Əlbəttə, “Səbail”in bu oyunda asanlıqla qalib gələcəyini iddia edə bilmərik. Ancaq favorit məhz qonaqlardı. Bəli, xaçmazlıların heç-heçə üçün tər tökəcəyini demək mümkündü. Ancaq “dənizçilər” mövsümdə ilk qələbəsini qazana bilməyən kollektivin sürpriz edə bilmək ehtimalını da nəzərə almalı, necə deyərlər, ayıq-sayıq olmalıdı. Bu baxımdan, həm “Mingəçevir”in, həm də “Səbail”in işi asan deyil. Elə “Zaqatala”nın da. Düzdü, bölgə təmsilçisi ötən həftə MOİK-i yenməklə zəif bənd olmadığını göstərdi. Ancaq budəfəki rəqib mövsümün hələ uduzmayan kollektivlərindən biri olan “Baku Sportinq”di. Buzovnalılar ilk “üçlük”də qərarlaşmaqla yanaşı, uğurlu seriya əldə edib. Odu ki, mövqelərini qorumağa çalışacaqlarına şübhə yoxdu.

Turun növbəti matçında “Şəfa” evdə MOİK-lə qarşılaşacaq. Əlbəttə, paytaxt təmsilçisinin yeganə amalı birinci pillədəki yerini qorumaq olacaq. Kollektiv çempionluq hədəfinə çatmaq niyyətində olduğundan mümkün olduğu qədər xal itkisindən qaçmalıdı. İş ondadı ki, “hərbçilər”in də məqsədi eynidi. Bu üzdən, Binədə keçiriləcək görüşün yetərincə gərgin və baxımlı alınacağını proqnozlaşdıra bilərik.

Tura “Cəbrayıl” – “Difai” oyunuyla yekun vurulacaq. Bu o deməkdi ki, Şamaxıda hələ mövsümdə qələbə qazana bilməyən komandaların duelinə şahidlik edəcəyik. Autsayderlər bu matçda bir-birinə güc gəlməklə uğursuz seriyanın qırılmasına səy göstərəcək. Hər halda, bu komandaların sonuncu pillələrdə rahat olmağa ixtiyarı yoxdu. Bəs, məqsədə kim çatacaq? Ağsu təmsilçisinin indiyə qədər daha inamlı oyunlarla yadda qaldığı bəllidi. Ancaq “Cəbrayıl”ın 10-cu sıradan yaxa qurtara bilməsi də sürpriz sayılmayacaq.

1 oktyabr
Şahdağ Qusar – Mingəçevir
Şamaxı, Olimpiya İdman Kompleksinin stadionu. Saat 15.00.

2 oktyabr
Şimal – Səbail
Şamaxı, Olimpiya İdman Kompleksinin stadionu.

Zaqatala – Baku Sportinq
Zaqatala, Olimpiya İdman Kompleksinin stadionu. Saat 15.00.

Şəfa – MOİK
Binə, qəsəbə stadionu. Saat 15.00.

3 oktyabr
Cəbrayıl – Difai
Şamaxı, Olimpiya İdman Kompleksinin stadionu. Saat 15.00.

Xal durumu: Şəfa, Səbail – 9, Baku Sportinq – 7, Mingəçevir, Zaqatala – 6, Şahdağ Qusar – 3, MOİK, Difai, Şimal – 1, Cəbrayıl – 0.

Bombardirlər: Ruslan Vorontsov (Şahdağ Qusar), Emin Zamanov (Şəfa) – 3.

KƏNAN BAHADIR