Sirr deyil ki, son günlər "Qarabağ"ın baş məşqçisi Qurban Qurbanovun kefinə soğan doğranıb.

Adətən, sakit təbiəti, hadisələrin axarına səbrlə yanaşması və emosiyalarına hakim olması ilə seçilən mütəxəssis komandasının "Atletik", "Şamaxı" və "İmişli" ilə matçlarında özünə bənzəmir. O, Bilbaoda biranlıq sanki oyundan qopan Elvin Cəfərquliyə, "şirlər"lə oyunda yanlış qərarlar verən Dani Bolta, "pələnglər"lə matçda isə tez-tez top itirən, əvəzlənərkən meydanı, necə deyərlər, nazlana-nazlana tərk edən, özü də hakimin tələbinə uyğun olmayan yerdən çıxdığına görə sarı vərəqə alan Kadi Borgesə qəzəbini gizlətmədi. Mütəxəssisin bir neçə gün əvvəl komandanın bütün futbolçularını cərimələdiyi haqda da xəbərlər yayılıb.

İş ondadı ki, bütün başverənlərin fonunda qarşıdan "Çelsi" ilə matç gəlir. "Köhlən atlar" Çempionlar Liqasının 4-cü tur oyununda İngiltərə nəhəngini qəbul edəcək. Heç şübhəsiz, hədəf azı bir xal əldə etməklə ilk "24-lük" uğrunda mübarizədə şansları artırmaqdı. Lakin bu gün nə "Qarabağ" tanıdığımız "Qarabağ"dı, nə də Qurban Qurbanov.

Çox təəssüf ki, "köhlən atlar" son üç matçda həm müdafiə, həm də hücum planında çox ciddi səhvlərə yol verir. Niyə? Bəlkə "Benfika" və "Kopenhagen" üzərində qazanılan qələbələr komandanın başını o qədər gicəlləndirib ki, hələ düzgün istiqaməti tapa bilmirlər? Bəlkə nəinki yerli, hətta dünya mətbuatından "Qarabağ"ın ünvanına yağan tərif futbolçuları bihuş edib? Ümid edək ki, yox. Biz bu ehtimalı ağla belə gətirmək istəmirik. Çünki hələ reallaşacağına inandığımız xəyallar, bizi qürurlandıracağına inandığımız "Qarabağ" var. Və hər şey məhz Qurban Qurbanovdan asılıdı. Həmişə olduğu kimi, bütün məsuliyyət yenə baş məşqçinin üzərindədi.

Bəs "Çelsi" ilə matçda ənənəvi "Qarabağ"ı görə biləcəyikmi? Bunu zaman göstərəcək. Hələ ki mənzərə fərqlidi. Qurban Qurbanovun “ürəyini partladan" nəsə var. "Qarabağ" isə daha "partlatmır"...

KƏNAN BAHADIR