Bilbaoya xal qazanmaq ümidiylə yollanan “Qarabağ”ın “Atletik”ə qarşı oyununu İqor Payats idarə edəcək.

Əlbəttə, “köhlən atlar”ın əsas mərhələni ilk “24-lük”də bitirməsini arzulayan milyonlarla azərbaycanlının daha bir istəyi yaşıl meydanlardakı hadisələrin axarına hansısa qərəzin, ayrı-seçkiliyin yox, məhz ədalətin yön verməsidi. Və bu həm də təcrübə işidi. Düzdü, söhbət Çempionlar Liqasının oyunundan gedirsə, hansısa işbilməzlikdən danışmaq yersiz olar. Lakin bu gün Ağdam təmsilçisinə azı bir xalın hava-su kimi lazım olduğunu nəzərə alsaq, ənənəmizə sadiq qalmalı, “fit sahibi” haqda ətraflı məlumatı oxucularımıza təqdim etməliyik.

İqor Payats... O, 1985-ci ildə Zaqreb şəhərində dünyaya göz açıb. Əksər həmkarları kimi ölkəsinin aşağı liqalarında fəaliyyətə başlayan “qarapaltarlı” 2015/26 mövsümündən bəri Xorvatiyanın əsas çempionatında iş başındadı. Hakim bu çərçivədə meydanda olduğu 137 matçda futbolçuları 681 sarı, 25 qırmızı vərəqə ilə cəzalandırıb. Payats 2018-ci ildən FİFA referilərinin siyahısındadı. O, beynəlxalq karyerası ərzində avrokubokların bütün turnirlərinin təsnifat mərhələlərində, məhz Konfrans və Avropa Liqasının isə əsas mərhələsində forma geyib. Başqa sözlə, ədalət təmsilçisi sabah Çempionlar Liqasının əsas mərhələsində debüt edəcək.

Bununla yanaşı, “fit sahibi”nin beynəlxalq yoldaşlıq oyunlarında, Gənclər və Millətlər Liqasında, habelə 17, 19 və 21 yaşadək futbolçuların Avropa çempionatının seçmə mərhələsində idarəçilik etdiyini vurğulayaq. Ona həm də Cənubi Kiprin, Yunanıstanın və Səudiyyə Ərəbistanının əsas çempionatlarında ehtiyac duyulub. Bu hakim ilk dəfə təmsilçilərimizdən birinin matçına təyinat alıb. Xoşqədəm ol, Payats!

Ümumiyyətlə, adı çəkilən referi karyerası ərzində 253 matç idarə edib. O, bu qarşılaşmalarda 1264 sarı, 50 qırmızı vərəqə göstərib.

KƏNAN BAHADIR