Bəli, “Qarabağ”ın “Kopenhagen”ə qarşı önəmli natçını türk əsilli ədalət təmsilçisi Sərdar Gözübüyük idarə edəcək.

"Football-plus.az"ın ənənəsinə sadiq qalaraq “fit sahibi”nin karyerası haqda ətraflı məlumatı təqdim etməzdən əvvəl bildirək ki, o, 1985-ci ildə Niderlandın Haarlem şəhərində dünyaya göz açıb.

Əslində hər şey ailəsinin illər əvvəl Adanadan bu şəhərə köç etməsiylə başlayıb. Erkən yaşlarından futbola həvəsiylə diqqəti çəkən Gözübüyük 16 yaşında Niderlandın aşağı liqalarında futbolçu kimi çıxış etsə də, 2006-cı ildən bəri hakim kimi fəaliyyət göstərməyə başlayıb. Beləliklə, ortaya Niderlandın FİFA referisi olan ən gənc hakimi kimi çıxıb. O, bu ölkədə fəaliyyət göstərən ilk və tək türkdü.

Sərdar Gözübüyük... Karyerasına Niderlandın aşağı liqalarında start verən referi elitada ilk matçını 24 yaşında 2009/10 “futbol ili”nin sonuncu turunda idarə edib. Beləliklə, Niderlandın peşəkar liqasında ən gənc hakim ünvanına yiyələnib. İndiyə qədər elitada 324 matçda ədaləti qoruyan Gözübüyük bu qarşılaşmalarda 1055 sarı, 54 qırmızı vərəqə göstərib.

O, 2012-ci ildən etibarən FİFA referisi statusu qazanıb. Bundan sonra avrokubokların bütün turnirlərinin təsnifat və əsas mərhələlərində fit çalan referi Millətlər Liqasının bütün liqalarında, Gənclər Liqasında, 17 və 21 yaşadək futbolçuların Avropa, 20 yaşadək futbolçuların dünya çempionatı sınaqlarında, həmçinin beynəlxalq yoldaşlıq oyunlarında ədaləti təmsil edib. Onun xidmətinə başqa ölkələrin yüksək liqalarında da ehtiyac duyulub. Dəqiq desək, BƏƏ, Səudiyyə Ərəbistanı və Belçika kimi ölkələr aparıcı komandalarının həlledici matçlarında məhz Gözübüyükün təcrübəsinə güvənib.

Sərdar bəy ikinci dəfə təmsilçilərimizdən birinin avrokubok sınağında iş başında olacaq. Belə ki, o, 2015-ci ildə Bakıda “İnter”lə (indiki “Şamaxı”) “Atletik” (İspaniya) arasında keçirilmiş Avropa Liqasının 3-cü təsnifat mərhələsinin cavab matçını idarə edib. Həmin oyunda qapılara qol vurulmayıb.

Ümumiyyətlə, 40 yaşlı referi karyerası ərzində 609 matç idarə edib. O, bu oyunlarda 2095 sarı, 114 qırmızı vərəqə ilə futbolçuları üzüb.

KƏNAN BAHADIR