Çempionlar Liqasındakı ilk iki oyunu buraxan Niko Uilyamsın sabah “Qarabağ” önünə çıxacağı heç kimdə şübhə doğurmur. Düzünə qalsa, “Atletik”in əsas qol ümidi də məhz odu. Optimal formadan nə qədər uzaq olsa da belə...

Niko ötən mövsüm Avropa Liqasında çıxış edən komandanın əsas ulduzu idi (13 oyunda 5 qol). Onda “Mançester Yunayted”lə yarımfinalın ilk oyununa (“San Mames”də 0:3) meydana çıxsa da, cavab görüşünü zədə üzündən buraxmışdı.
Uilyams qardaşları ÇL-də birgə oynamaqdan ötrü alışıb-yanırlar. Sol cinah yarımmüdafiəçisi Niko hücumun sivri ucunda yer alacaq İnyakiyə yardım etmək istəyir, o da kiçik qardaşına.

“Atletik” 2015-ci ilin fevralından bəri ÇL-də ev oyununda qələbə qazanmayıb. Onda Belarus çempionu BATE məğlub edilmişdi (2:0). Həmin oyunda nə Niko var idi, nə də İnyaki.

Bir sözlə, baş məşqçi Ernesto Valverde, eləcə də “Atletik” azarkeşləri sabahkı oyunda bütün ümidini Nikoya bağlayacaq. Deməli, “Qarabağ”ın sağ cinah oyunçularının – Mateus Silva ilə Aleksey Kaşukun (və ya bir başqasının) üzərinə inanılmaz yük düşəcək. ÇL-də ilk 24 komanda arasına düşməyin yolu Nikonu zərərsizləşdirməkdən keçir. Başqa yol yox artıq!

ORXAN