"Kayzerslautern" oktyabrın 18-də 2-ci bundesliqada növbəti matçını keçirdi. Mahir Emrelinin şərəfini qoruduğu komanda 9-cu turda "Karlsrue"nin meydanından qalib ayrıldı - 3:2.

Təbii ki, bu oyun Azərbaycan futbol ictimaiyyətinin diqqətində idi. Çünki yığmamızın DÇ-2026-nın seçmə mərhələsində Ukraynanın qonağı olduğu görüşdən sonra məlum fikirləri dilə gətirən Mahirin bu oyunda şans qazanıb-qazanmayacağı sual altında idi. İş elə gətirdi ki, baş məşqçi Torsten Liberknext bu dəfə də hücumçunun adını iştirak ərizəsinə daxil etmədi. Belədə hücumçu ardıcıl 6 (!) matçda heyətdən kənarda qaldı. Halbuki oyundan əvvəl klub rəhbərliyinin mütəxəssisə xəbərdarlıq etdiyi, Liberknextə böyük məbləğdə məvacib alan futbolçunun şans qazanmamasının məqsədəuyğun olmadığının izah edildiyi haqda xəbərlər yayılmışdı.
Görünür, Mahirin klubun idman direktoru və prezidentiylə görüşü arzulanan səviyyədə keçməyib.

"Kayzerslautern"də onu bağışlamaq istəyən yoxdu. Bəlkə də Emreli heç bu yöndə addım da atmayıb. Onun "qırmızı iblislər"lə yola davam etməsinin yeganə səbəbi alnız yayda imzalanan 3 illik müqavilədi. Problem isə hələ heç kim tərəfindən açıqlanmasa da bəllidi: Mahirin xarakteri!

İnanmaq olmur... Ötən il “Almaniya futbol ölkəsidi. Burda oynamaq inanılmaz hissdi. İnsanların futbol anlayışı, onların dəstəyi yüksək səviyyədədi. İlk dəfədi ki, mentallıq, futbol sevgisi olaraq tam bir Avropa ölkəsindəyəm. Burda o fərqi hiss edirsiz” sözlərini deyən hücumçu bu ay "vaxtı gələndə Almaniyanın futbol mentallığına yaraşmayan hər şeyi sizə danışacam" deyir. Deməli, günah ya bir ildə "yerlə bir olan" futbol mentallığındadı, ya da dəyişmək istəməyən Mahirdə! Ən doğrusunu siz bilirsiz...

KƏNAN BAHADIR