Mahir Emrelinin “Kayzerslautern” karyerası fiasko ilə nəticələnmək üzrədi. Bəli-bəli, artıq bu məsələylə bağlı həyəcan təbili çalmağın vaxtı çatıb. Ona görə ki, həmvətənimiz “qırmızı iblislər”in son 5 çempionat oyununda heyətdən kənarda qalıb. Baş məşqçi Torsten Liberknext bunu Mahirin rəqabətdə uduzmasıyla izah edir.

Bəs, həqiqətən belədimi? Bu sualın cavabı üçün “Kayzerslautern”in mərkəz hücumçularının mövsümü necə keçirdiyinə nəzər salaq.

İndiyə qədər 6 matçda meydana çıxan İvan Prtain 7 qol, 1 məhsuldar ötürmə ilə yadda qalıb. 2 oyunda şans qazanan Daniel Hanslikin hesabında isə 1 məhsuldar ötürmə var. Riçmond Taxi 6 görüşdə 1 qol vurmağı bacarıbsa, Dikson Abiama 4 oyunda fərqlənə bilməyib.

İş ondadı ki, Liberknext komandanı meydana 3-4-2-1 taktiki sxemiylə çıxaranda qol ümidini məhz Prtainə bağlayır. İnsafən, onun gözləntiləri artıqlamasıyla qarşıladığını bildirməliyik. Liberknextin 3-4-1-2 taktiki sxemində isə hücumda Prtainlə Taxi yer alır. Düzü, statistikaya əsasən Liberknexti qınamaq olmur. Hər halda, “Kayzerslautern” ilk 8 matçda 15 qol vurub və bu göstəricidə yalnız lider “Elversberq”dən (16) geri qalır.

Mahirin “bir nömrəli düşməni” isə məhz Xorvatiyadan olan 29 yaşlı Prtaindi. Deməli, Mahir “Kayzerslautern”in düşərgəsində daha güclü qayıtmağa borcludu. Azı Prtain qədər güclü!

KƏNAN BAHADIR