Nuno Eşpirito Santonun qovulmasından sonra ''Nottingem Forest''in başına keçən Angelos Postekoğlunun gələcək taleyi indidən müzakirələrə səbəb olub.

Bu gedişlə onun bu klubdakı dönəmi çox tez bitəcək. Təcrübəli mütəxəssis hələ də yeni klubunda qələbəyə həsrətdi. ''Nottingem Forest'' bu gün ''Çelsi'' ilə oyunda da məğlub oldu (0:3). Komanda bu məşqçi ilə keçirdiyi 8 qarşılaşmadan 2 heç-heçə, 6 məğlubiyyətlə ayrılıb.

Maraqlıdı ki, Postekoğlu ''Çelsi'' ilə oyunöncəsi mətbuat konfransında mümkün istefası ilə bağlı suala cavab verərkən kubok qazanmaqdan dəm vurub. 60 yaşlı məşqçi ''mənə vaxt versəz, həmişəki kimi bu hekayənin sonu da titulla bitəcək'' açıqlamasını verib.

Postekoğlu çalışdırdığı klublarla ikinci mövsümündə titul qazanması ilə məşhurdu. Onun bu seriyası ''Tottenhem''də də davam etmiş və London klubu bu məşqçinin ikinci mövsümündə Avropa Liqasının qalibi olmuşdu.