Piastri “Ferrari”yə keçmək istəyir?
“Formula-1” üzrə dünya çempionatında mövsüm sona yaxınlaşdıqca ayrı-ayrı pilotların komandasını dəyişmək perspektivi ilə bağlı xəbərlər artır.
“Blick” nəşrinin əməkdaşı Rocer Benua Oskar Piastri haqda cəlbedici xəbər yayıb.
Onun yazdığına inansaq, “Maklaren”in pilotu 2026 mövsümünün ardından “Ferrari”yə keçə bilər. Həmkarımızın fikrincə, Piastrinin və Lando Norrisin “Maklaren”lə uzunmüddətli müqaviləsi olsa da, avstraliyalı hazırda komandasını dəyişmək üzərində düşünür və 2027 mövsümünə “Ferrari”də başlamaq istəyir. İş ondadı ki, dünya mediasında “Ferrari”nin pilotu Şarl Leklerin də 2026 mövsümü bitəndən sonra bu komandadan ayrılacağı ilə bağlı xəbərlər yayılıb.
“RMC Motori” nəşrinin yaydığı xəbərə görə, monakolu pilotun meneceri Nikolya Todt onun gələcəyi ilə bağlı “Maklaren”, “Mersedes” və “Aston Martin” təmsilçiləriylə danışıq aparıb.
Xatırladaq ki, Piastri 2023-cü ildən bəri “Maklaren”in şərəfini qoruyur. O, cari mövsümdə 336 xal toplayıb və turnir cədvəlinə başçılıq edir. Piastrinin ən yaxın izləyicisi ondan 22 xal geri qalan komanda yoldaşı Norrisdi.
Bu arada sabiq “Formula-1” pilotu, hazırda isə ekspert kimi çalışan Ralf Şumaher də “Ferrari”dəki vəziyyətdən danışıb.
"Fikir versəz, “Ferrari” pulunun çoxunu əsl fəlakətə xərcləyir. Onların ehtiyac duyduqları hər şey var. Onların iki ən yaxşı pilotu və insanları bir araya gətirən, birlikdə işləməyə kömək edən Frederik Vasör var. Onlar uğur qazanmaq üçün lazım olan hər şeyə sahib olmalıdılar. Maşın, mühərrik, transmissiya - hər şeyi bir dam altındadı. Buna görə də bəzən onların niyə axsadıqlarını başa düşmək çətin olur”.
“Ferrari” hazırda 298 xalla Mühəndislər kubokunun turnir cədvəlində üçüncüdü. “Formula-1” mövsümünün bitməsinə altı tur qalmış “Mersedes” 325 xalla ikincidi. “Maklaren” isə 650 xal toplamaqla vaxtından əvvəl çempion olub.
Digər xəbərlər
