“Maklaren” Piastri ilə anlaşdı
“Formula-1” komandalarından “Maklaren” avstraliyalı pilotu Oskar Piastri ilə müqavilə müddətini uzatdığını elan edib.
"Football-plus.az" xəbər verir ki, yeni müqavilə 2026 mövsümünün sonuna qədər nəzərdə tutulub. Piastri anlaşmanı yeniləməsi ilə bağlı bunları deyib:
“Maklaren”lə tərəfdaşlığımı uzun müddətə uzatdığıma görə çox sevinirəm. Bu komanda ilə ən yüksək yerlər uğrunda mübarizə aparmaq istəyirəm. Bizi buna aparacaq baxışları və təməlləri görmək məni ruhlandırır”.
Bununla bağlı açıqlama verən “Maklaren”in baş direktoru Zak Braun sevincini dilə gətirib:
“Oskarla əməkdaşlığımızın 2026-cı ilin sonuna qədər davam edəcəyi üçün çox şadam. O, inanılmaz dərəcədə istedadlıdı və komanda üçün dəyərlidi. Oskar bu mövsüm dönüş yaratmağımızda böyük rol oynadı”.
Piastri Böyük Britaniya komandasına ötən ilin sonunda qoşulub. Hazırda 42 xalı olan pilot şəxsi hesabda 11-ci yerdə qərarlaşıb. 22 yaşlı pilotun cari mövsümdəki ən yüksək nəticəsi Böyük Britaniya mərhələsində 4-cü yeri tutması olub.
Xatırladaq ki, Böyük Britaniya komandası bir müddət əvvəl digər pilotu Lando Norrislə də 2026-nın sonuna qədər müqavilə bağlayıb.
Digər xəbərlər
