Leklerin meneceri ona yeni iş yeri axtarır
“Ferrari”nin pilotu Şarl Leklerin meneceri Nikolya Todt “Formula-1” üzrə dünya çempionatında çıxış edən üç komanda ilə əlaqə saxlayıb.
“RMC Motori” nəşrinin yaydığı xəbərə görə, monakolu pilot 2027 mövsümünə başqa komandada başlamaq niyyətindədi. Xəbərdə o da qeyd olunur ki, Todt Montsada “Maklaren”in təmsilçiləri, eləcə də komandanın rəhbəri Andrea Stella ilə görüşüb. O, həmçinin “Aston Martin”in bossu Lourens Stroll və “Mersedes”in rəhbəri Toto Volff ilə təmas qurub.
Lekler 2019-cu ildən “Ferrari”nin şərəfini qoruyur. 2022-ci ildə dünya çempionatında 2-ci yeri tutub. Şarl “kral avtoyarışları”nda 48 dəfə fəxri kürsüyə qalxıb, 8 dəfə birinci olub. 27 yaşlı pilot cari mövsümdə 165 xalla 5-ci pillədə qərarlaşıb.
Yeri gəlmişkən, Lekler hazırda 255 xalla 3-cü pillədə qərarlaşan “Red Bull”un pilotu Maks Ferstappenin çempionluq şansı haqda da danışıb:
“Mən deyərdim ki, Maksın 20 faiz şansı var. Ümumi sıralamada fərq əhəmiyyətlidi. Beləliklə, Maks üçün çempionluq mənə çətin görünür. Aydındı ki, “Red Bull”un Montsa mərhələsi üçün hazırladığı təkmilləşdirmələr çox yaxşı nəticə verdi. Amma bunun gələcəkdə “Maklaren”i məğlub etmək üçün kifayət edəcəyini düşünmürəm”.
