Misli premyer-liqasının 8-ci turunda “Şamaxı” evdə “Kəpəz”ə məğlub oldu – 1:4.

“Football-plus.az” meydan sahiblərinin baş məşqçisi
Ayxan Abbasovun mətbuat konfransından hesabatı təqdim edir.

- Üzücü məğlubiyyət oldu. Azarkeşlərimizə təşəkkür edirəm. Təəssüf ki, onları sevindirə bilmədik. Rəqibi təbrik edirəm. Çempionatda belə oyunlar olur, səndə heç alınmır, hər şey rəqib tərəfdə olur. Bu gün bizim üçün həmin matçlardan idi. Oyuna yaxşı başlasaq da, qol vursaq da, 20-ci dəqiqədən sonra komandada eniş hiss etdik. Matçın qırılma anı Abdullahi Şuaybunun qırmızı vərəqə aldığı epizod idi. Bəlkə də 11 nəfərlə oynasaydıq, nələrisə dəyişə bilərdik. Növbəti qarşılaşmalara hazırlaşmalıyıq. Belə hadisələr ötən mövsümdə də başınıza gəlib. Zədələr var. Rotasiyalar etməkdə çətinlik çəkirik. Amma bu, bəhanə deyil. Komanda olaraq toparlanmağa ehtiyacımız var.

- Şuaybunun qırmızı vərəqə aldığı epizodu necə şərh edərdiz?
- Şuaybunun günahı böyükdü. Təsəlli ediləsi bir şey yoxdu. Futbolçuları belə epizodlara hazırlamışdım. "Kəpəz"in oyunçuları var ki, rəqib hücumçuları özündən çıxarmağı bacarır. Onlardan biri Dioqo Verdaşkadı. Belə qırmızı vərəqələri bağışlamıram. Çünki komandanı pis vəziyyətdə qoydu. Bəlkə də özünü keçmiş komandasına göstərmək istəyir.

- "Şamaxı" "Kəpəz"ə nədə məğlub oldu?
- Bu gün rəqibdə hər şey alındı. Bizdən istəkli olduqlarını da demək lazımdı. İlk 20 dəqiqədə oynadığımız oyunu saxlamaq lazım idi. Qol da vurmuşduq. Bu gün rəqib bizdən üstün idi.

- Sizin iki həftə milli komandada olmağınızın təsiri ola bilər?
- Ötən ay millidən qayıdandan sonra ən yaxşı oyunumuzu oynamışdıq, "Karvan-Yevlax"a qalib gəldik. Mənim olub-olmamağımın məğlubiyyətə təsiri yoxdu. Bəzi futbolçular olmayanda oyunumuz aşağı düşür. İrəli baxmaq lazımdı.

- İki həftə ərzində üç məğlubiyyət mental olaraq sizə necə təsir edir?
- Əlbəttə çətindi. Məğlubiyyətlərdən sonra daha güclü olmalısan. Neçə ildi premyer-liqadayam. Ardıcıl məğlubiyyətlər də, qələbələr olub. Bu dəqiqə biz futbolçularda özünəinam yaratmalıyıq. Bilirik ki, nə üçün vuruşuruq. Bəli, bizə uyğun rəqiblərlə matçlarda məğlubiyyət qəbuledilməzdi. Amma futbolda hər şey olur.

MÜZƏFFƏR QULUZADƏ