“Neftçi”nin veteran futbolçusu, sabiq baş məşqçisi Əsgər Abdullayev “Palms Sports” Futbol Mərkəzinin qonağı olub. “Neftçi”nin baş icraçı direktoru Cenk Sümer və digər klub nümayəndələri ilə görüşən Abdullayevə 65 illik yubileyi münasibətilə xatirə hədiyyəsi təqdim edilib.

Görüşdə “Neftçi”nin hazırkı durumu və gələcək planları haqda fikir mübadiləsi aparılıb. Daha sonra yubilyar “Neftçi TV”yə geniş müsahibə verib.
Qeyd edək ki, 1979-cu ildə “Neftçi”də debüt edən Əsgər Abdullayev qısa müddətdə əsas heyət üzvlərindən birinə çevrilib. Ümumilikdə “ağ-qaralar”ın heyətində keçirdiyi 15 mövsüm ərzində 397 oyunda meydana çıxan müdafiəçi bu göstəricidə yalnız Sergey Kramarenkodan geri qalır.

Etibarlı oyunu ilə seçilən Abdullayev “boş qapıdan top çıxarmaq” üzrə SSRİ rekordçusudu. O, 70 dəfə “ağ-qaralar”ı qoldan xilas edib. “Neftçi”nin heyətində vurduğu yeganə qol 1987-ci ildə “Jalgiris”lə heç-heçə nəticələnmiş (1:1) səfər oyununa təsadüf edir ki, futbolçu son dəqiqələrdə bu qola imza atmaqla yenə xilaskar rolunu oynayıb.

Əsgər Abdullayev bir neçə il kapitanı olduğu “ağ-qaralar”la 1992-ci ildə müstəqil Azərbaycanın ilk çempionluğunu yaşayıb. Futbolçu karyerasını bitirəndən sonra məşqçiliyə başlayıb, “Neftçi”nin və yığmanın “sükanı arxasında” olub. Serbiya yığmasını evdə məğlub edib, səfərdə heç-heçə oynadığına görə “serb cəlladı” ləqəbini də alıb.