“Fənərbaxça” bu mövsüm hücumda çox “dişsiz” görünür.

"Football-plus.az" xəbər verir ki, yayda böyük ümidlərlə transfer olunan Con Duran avqustun sonlarında bəri zədə üzündən komandaya yardım edə bilməyib. Digər hücumçu Yussef Ən-Nəsiri isə bərbad performansı ilə fanatlara saç-baş yoldurmaqda davam edir.

Ötən mövsüm 52 rəsmi oyunda 30 qol, 7 məhsuldar ötürmə ilə komandasının ən məhsuldar futbolçusu olan mərakeşli forvard bu mövsüm tez-tez “Fənər”lilər tərəfindən fitə basılır. Səbəb isə məhsuldarlığının aşağı olmasıdı. Mövsümün ilk 9 rəsmi oyununa 5 qol, 1 məhsuldar ötürmə sığışdıran Ən-Nəsiri son 5 qarşılaşmada hesabına heç bir məhsuldar hərəkət yaza bilməyib! O, son qolunu sentyabrın 17-də “Alanyaspor”la oyunda vurub və bəzi statistik göstəriciləri dünya səviyyəli bir hücumçu üçün çox zəifdi. Məsələn, 28 yaşlı futbolçu 2025/26-da 8 superliqa matçının yalnız üçündə (4 qol vuraraq) fərqlənə bilib. Bu oyunlarda 5 dəfə yüzfaizlik qol fürsətini boşa verən mərakeşlinin qol şansını dəyərləndirmək faizi hazırda 17-yə bərabərdi. Ən-Nəsiri zəif performansla indidən rəhbərliyi peşman edib. Çünki yayda Əli Koçun dönəmində “Fənərbaxça” bu futbolçu üçün Səudiyyə Ərəbistanından 30-40 milyon avroluq təkliflər almışdı. Amma həmin vaxt Joze Mourinyo onun satışına qarşı çıxmışdı.

Digər tərəfdən iddialara inansaq, Ən-Nəsiri özü də yayda “Fənər”dən ayrılmadığına görə peşmandı. O, son iki qarşılaşmada – “Nitsa” və “Samsunspor”a qarşı oyunlarda meydanı fit sədaları altında tərk etdi. “Nitsa” ilə matçda əvəzlənəndən sonra birbaşa paltardəyişmə otağına yollanaraq qələbəni fanatlarla birlikdə qeyd etmədi. Bu gedişlə tərəflərin qışda yollarını ayırması təəccüblü olmayacaq. Ən-Nəsirinin 2,5 milyonluq “instaqram” səhifəsində “Fənər”ə aid son şəkil və videoları silməsi diqqəti çəkib. Bir neçə gün öncə “sarı-lacivərdlilər”in digər üzvü – sol müdafiəçi Arçi Braun da fanatların etirazından təngə gələrək eyni addımı atmışdı. Ən-Nəsiri fevraldan (!) bəri “Fənərbaxça” ilə bağlı heç bir paylaşım etməyib. İddialara inansaq, o, menecerinə klub axtarışlarına başlamağı tapşırıb. “Fənərbaxça” ilə 2029-cu ilə qədər müqaviləsi olan təcrübəli futbolçunun sonrakı oyunlarda necə təsir bağışlayacağı böyük maraq doğurur.

Türkiyənin “Sözcü” nəşrinin yazdığına inansaq, baş məşqçi Domeniko Tedesko da onun performansından təngə gəlib və məşqlərdə nominal hücumçusuz sistemi sınaqdan keçirir. Qarşıdakı oyunlarda “Fənər”də mərkəz hücumçusu mövqeyində Kərəm Aktürkoğlunun və ya Anderson Talişkanın qərarlaşması sürpriz olmayacaq. Kərəm Türkiyə yığmasında bir neçə dəfə bu mövqedə oynayıb.