“Üç nəfərə 25 manat yolpulu verdi, axşam da yığıb dedi ki, haramınız olsun” - bölgə klubunda şok olay!
“Quba”nın indiki faciələrinin əsası sentyabrın 29-da keçirilən “Ağdaş”la səfər oyunundan sonra qoyuldu. 2:0 hesablı qələbənin əldən getməsi, oyunun 2:2 bitməsi “Quba”nın prezidenti Ayaz Abdullayevi necə qəzəbləndirdisə, şəraiti bəyənməyən hər kəsi bazadan qovdu. 11 futbolçu getdi, ardından baş məşqçi Elvin Həsənov də “Şəki”nin “sükanı arxasına” keçdi.
Bir neçə gün əvvəl Ayaz Abdullayevlə söhbətləşərkən gedən futbolçular haqda “bu ayrılıq deyil, xəyanətdi” fikrini səsləndirmişdi, gedənlərin hərəkətinin Quba futboluna ləkə olduğunu bildirmişdi. “Quba”nın cari mövsüm üçün iştirak ərizələrində 20 futbolçu var idi, 11-i getdi, yerdə qaldı 9-u. Klub prezidenti ölkə kuboku çərçivəsində “Xankəndi” ilə dünənki oyundan əvvəl “vatsap” statusunda 11 nəfərlə, ehtiyat oyunçular skamyasında futbolçu olmadan oynayacaqlarını açıqladı. Bəs digər iki futbolçu hardan çıxdı, klub bunları hardan gətirdi?
Bu və başqa məqamları araşdırdıq. Komandanın sabiq kapitanı, ayrılan 11 futbolçudan biri olan Rüstəm Nuruyevlə əlaqə saxladıq. 25 yaşlı futbolçu da açdı sandığı, tökdü pambığı:
“Komanda daxilində çətin vəziyyət ola bilər. Mənə başqa vədlər verilmişdi. Maaşlar ayın 10-da verilməliydi, 26-27-də verildi. Bizə demişdi ki, oteldə qalacaqsız. Gətirdi bizi saldı restoranın otelinə. İki villa idi. Dedi ki, hərə özünə bir otaq tutsun. “Ağdaş”la oyundan sonra bizə dedi ki, gedin Bakıya, istirahət edin. Yolpulumuz yox idi. Bakıdan Qubaya gəlmək üçün nəfərə 25 manat yolpulu verirdi. Sonra axşam yığdı dedi ki, haramınız olsun. Açığı, mənim Qubaya qayıtmaq fikrim var idi. Bəlkə də qayıdacaqdım. Amma bu sözdən sonra qayıda bilməzdim. Nişanlı adamam. Mənə öz ailəm maraqlıdı. Mənə verilən otağın hər şeyini özüm yığıb qoymuşam, heç kim mənə kömək etməyib. Çıxıb yalandan danışır. Deyir ki, bizə xəyanət ediblər. Xəyanət maaşı süründürə-süründürə vermək, telefonları açmamaqdı. Biz oteldə qalanda günlərlə çörək verilməyib. AFFA-ya da şikayətimi bildirəcəm. İnanıram ki, federasiya kasıb uşaqları yarıyolda qoymaz. Bir şey olanda oteldə üstümüzə qışqırır ki, məkan mənimdi, bura mənim məkanımdı. Müqavilədə var ki, kimliyindən asılı olmayaraq, bazanın ərazisində araq içilə bilməz. Bu hər gün gəlir, səhərdən axşama, gecəyə qədər içir. Belə şey olar? Məndən başqa 8 futbolçu da eyni vəziyyətdədi. Düzdü, ayrılan 11 futbolçu idi. Sonradan iki futbolçunun pulunu əvvəldən verib, ya nəsə olub, qayıdıblar. Bir daha deyirəm, mən AFFA-ya şikayətimi bildirəcəm. İnanıram ki, onlar bizim dadımıza çatacaqlar”.
Bəs “Quba” 2-ci liqadakı növbəti oyunlarda ehtiyat futbolçular olmadan necə çıxış edəcək? “Transfer pəncərəsi” də bağlıdı. Yeni futbolçuları komandaya necə cəlb edəcəklər? Bu sualı PFL-in Media və marketinq direktoru Sənan Abdullayevə ünvanladıq: "İstənilən liqada transferlər qaydalara uyğun aparılır. Yəni klublar öz istəklərinə uyğun yox, qaydalara uyğun hərəkət edə bilərlər. Hazırda klublara ancaq son statusu peşəkar olan azad agent oyunçular cəlb oluna bilər. “Quba” ilə danışmışıq, onlar vəziyyəti nəzarətə alıblar, yeni oyunçular cəlb olunursa, bunlar qaydalara uyğun transferlərdi".
MÜZƏFFƏR QULUZADƏ
Digər xəbərlər
