“Oyun yaxşıdısa, hər şey düzələr. Bəli, “Neftçi”nin problemi oyun planı ilə bağlı deyil. Oyun baxımından “Sabah”dan, “Araz-Naxçıvan”dan geri qalmırlar. Nə etmək istədikləri bəllidi. Yaxşı oyun göstərirlər. Amma bu futbolçuların keyfiyyəti, ustalığı yaxşı nəticə qazanmağa imkan verirmi? Əsas sual budu. Çünki 7 oyunluq yola baxsaq, “Karvan-Yevlax”, “İmişli” ilə oyunlarda xeyli qol imkanları yaratmışdılar. Lakin qol vura bilmirlər. Ribeyro da müdafiə xəttində yetərincə yaxşıdı. Amma hücum xəttində axsaqlıqlar var. Qurduqları hücumları qolla tamamlaya bilmirlər. Əsas problem budu. Qıraqdan belə görünür. Bu problemi həll etmək lazımdı. Hücumameyilli futbolçu lazımdı. Oyun qurucu da olsa, yaxşı ola bilər. Emin Mahmudov bunu edə bilər, amma o daha çox geridən hücum quran futbolçudu. Adam aldatmağı bacaran yarımmüdafiəçiyə də ehtiyac duyulur. Hücumun sivri ucunda isə... Sambunun döyüşkənliyi, xarakteri var - belə görünür. Amma sən “Neftçi”nin hücumçususansa, bunlar kifayət etmir. Çətin durumda olanda qol vurub komandaya qələbə gətirən hücumçu lazımdı. “Neftçi” avrokuboklara vəsiqə uğrunda mübarizədə əsas rəqiblərindən geri düşüb. Hələ 7-ci turdu. Qış fasiləsində yeni transfer etsələr, gəlib çata bilərlər. Hazırda bütün komandalar buna nail ola bilər. “Kəpəz”in də üzünə avrokuboklara gedən yol açıqdı. Buna nə qədər potensial var - “Kəpəz” üçün sualdı. Amma “Neftçi”nin potensialı var. Məşqçisi, futbolçuları, klub bu gücə malikdi. Lazımi xalları toplasalar, sonda avrokubok hədəflərinə nail ola bilərlər”.