“Beş tura ümumi nəzər salsaq, görərik ki, turnir cədvəlində surpriz mövqelər var. Oyun baxımından da bəzi klublarda qeyri-sabitlik müşahidə olunur. Bəzilərində avrokuboklardan sonra yorğunluq, ruh düşkünlüyü, bəzi komandalarda yeni transferlər və başqa amillər rol oynadı. Məsələn, "Neftçi" heyətinə hələ də yeni futbolçular qatır. Ona görə də qənaətbəxş nəticə göstərə bilmir. "Ağ-qaralar”ın durumu göz qabağındadı. Artıq çox, həm də vacib xallar itirilir. Mövsümün əvvəlində baş məşqçi gətirilərkən həmişə qarşıya çempionluq və ya kubok məqsədi qoyulur. Amma hadisələrin belə axarı "ağ-qaralar"ı çempionluq mübarizəsindən uzaqlaşdırır. Düşünürəm ki, "Neftçi"yə yeni transferlər cəlb edirlər və bunun da öz təsiri var. Baxaq görək, faisilədən necə yararlanırlar. Amma hər şey onu göstərir ki, bu il də çempionluq savaşında "Neftçi"nin "Qarabağ"a gücü çatmayacaq. Bütün fikrini ya kuboka, ya da 2-3-cü yer üçün oynamağa yönəldəcək."Turan Tovuz" sürpriz şəkildə turnir cədvəlinə başçılıq edir. Kurban Berdıyevin gəlişindən sonra yüksəliş hiss olunur. Oyun fəlsəfəsi var ki, daha çox müdafiəyə diqqət yetirib əks-hücumlarda oyunlarını qururlar. Amma “Turan Tovuz” “avrokubok zonası”na düşmək istəyirsə, yeni transferlər olmalıdı. "Səbail"in strategiyasına baxsaq, iddia azalıb, artıq gənclərə şans verilir. "Kəpəz" çempionata pis başlayıb və artıq məşqçi dəyişikliyi də oldu. Bu da oyunçularin gedişi, büdcə problemi ilə bağlıdı. "Araz-Naxçıvan" normal heyət formalaşdırıb, yaxşı da çıxış edir. Baxmayaraq ki, "Şamaxı" güclülər dəstəsinə yeni qayıdıb, amma oyunu ilə yaxşı mənada təəccübləndirir. Bu baxımdan hələ sabitlik yoxdu. Düşünürəm ki, millinin oyunları ilə bağlı yaranan fasilədə artıq komandalar çatışmayan cəhətlərinin üstündə işləyərək düzəlib. Növbəti oyunlarda biz kimlərin çempionluq, kimlərin avrokuboklar, kimlərin də güclülər dəstəsində qalmaq üçün oynayacağını biləcəyik”.