“Boka Xuniors” matəmə bürünüb. Komandanın baş məşqçisi Migel Anxel Russo vəfat edib.

"Football-plus.az" xəbər verir ki, mövsümün qızğın çağında baş verən bu hadisə Argentina futbol ictimaiyyətini də kədərə boğub.

Ağır xəstəliyə məğlub oldu...
Russo oktyabrın 8-də 69 yaşında dünyasını dəyişib. Buenos Ayres klubunun yaydığı məlumatda belə bildirilib: “Migel Anxel Russonun vəfat etdiyini böyük məyusluq hissi ilə bəyan edirik. O, klubumuzun tarixində silinməz iz buraxdı və xatirələrdə hər zaman sevincin, səmimiyyətin və zəhmətkeşliyin nümunəsi kimi qalacaq. Bu kədərli anda onun ailəsinə və yaxınlarına dərin hüznlə başsağlığı veririk. Həmişəlik əlvida, əziz Migel”.
Xatırladaq ki, 2017-ci ildə Russoya ciddi xəstəlik – prostat xərçəngi diaqnozu qoyulmuşdu. Məşqçi o vaxtdan müalicə kursu keçsə də, ötən 8 il ərzində müxtəlif klublarda işləyib. Yəni sevimli işini heç vaxt dayandırmayıb.

Sentyabrın əvvəlində səhhəti pisləşən Russo sidik yollarının infeksiyası ilə xəstəxanaya yerləşdirilmişdi. Həkimlər bir neçə gün klinikada qalan qocaman mütəxəssisə işbaşına qayıtması üçün icazə vermişdilər. Lakin səhhətində növbəti problem yarandı. Russo sentyabrın sonunda məşqdən sonra susuzluq əlamətləri ilə yenidən xəstəxanalıq olmuşdu. Maraqlıdı ki, komandanı klinikadan idarə etməyə çalışırdı. “Boka Xuniors”un məlumatında “biz onunla və həkimlərlə daim əlaqə saxlayırıq. O, klubda baş verən hər şeydən xəbərdardı” deyə bildirilmişdi.

Komanda Russosuz iki oyun keçirdi. “Defensa y Xustisiya”yaya 1:2 hesabıyla uduzan paytaxt təmsilçisi “Nyuellz Old Boyz”un qapısından 5 cavabsız top keçirdi. Bu matçlarda “göy-sarılar”a Russonun köməkçisi Klaudio Ubeda başçılıq etdi. O, oktyabrın 5-də böyükhesablı qələbədən sonra futbolçulara Russonun son oyunları izlədiyini söyləmişdi. Ancaq baş məşqçi bir daha komandanın başına keçə bilmədi: ayın 8-də uzun müddət mübarizə apardığı ağır xəstəliyə məğlub oldu...

“Boka”nın əfsanəsi
Əslində Russo “Boka”da heç də uzun müddət çalışmayıb. Doğrudu, komandaya üç dəfə - 2007, 2020-21-ci və bu il rəhbərlik edib. Ancaq bu da var ki, heç bir halda komandanın başında iki tam mövsümdən çox qalmayıb. Buna baxmayaraq, ölkə nəhənginin əfsanəsinə çevrilə bildi. Necə? “Boka” onun rəhbərliyi altında bir sıra əhəmiyyətli titullar qazandı: 2007-ci ildə Libertadores Kubokunda qalib gələn komanda 2019/20 mövsümündə Argentina çempionatının və Liqa Kubokunun ən güclüsü oldu.

Klubun rəsmi məlumatında yazılan bu cümlələri də nəzərinizə çatdırırıq:

Russo futbolçu karyerası ərzində yalnız “Estudiantes”də top qovub. Dayaq yarımmüdafiəçisi yetirməsi olduğu bu klubun formasında 1975-88-ci illərdə 418 matçda meydana çıxaraq 11 qol vurub. Argentina yığmasında 1983-85-ci illərdə 17 oyun keçirib və 1 qola sevinib. 1989-cu ildə məşqçiliyə başlayıb. Uzunmüddətli karyerası ərzində ölkəsində “Lanus”, “Veles Sarsfild”, “Rosario Sentral”, “Kolon”, “Los Andes”, “San Lorenso”, “Rasinq”, “Estudiantes”, Səudiyyə Ərəbistanında “Əl-Nəssr”, Kolumbiyada “Milyonarios”, Meksikada “Moreliya”, İspaniyada “Salamanka”, Peruda “Alyansa Lima”, Paraqvayda isə “Serro Portenyo”nu da çalışdırıb.

O, “Boka”nı zirvəyə çıxarıb dünyasını dəyişdi. Komanda ölkə çempionatının son turunda “Nyuellz Old Boyz” üzərində qələbə ilə bu mövsüm ilk dəfə 1-ci yerə çıxdı. Özü işbaşında olmasa da, bütün ruhu ilə “Boka”nın yanında idi...