“Saşa İliçdən 2-ci dövrədə daha yaxşı nəticələr gözləyirik” – “Sumqayıt”ın qələbə həsrəti haqda...
Yeni mövsümə Saşa İliçin rəhbərliyi altında başlayan “Sumqayıt” 3 turdu qələbəyə həsrətdi. “Kimyaçılar” sonuncu dəfə 4-cü turda “İmişli”yə meydanda məğlub olsa da (0:1), texniki qələbə sayəsində “papağını göyə atıb”.
Görünür, bu mənzərə nə “Sumqayıt”ı narahat edir, nə də azarkeşlərini. Ona görə ki, “gənclik şəhəri”nin təmsilçisi Misli premyer-liqasının “doğma divarlar” arasında keçirilən 7-ci tur matçında “Turan Tovuz”a böyük hesabla (0:3) uduzsa da, “Kimyaçılar” fanklubundan dəstək gördü: komandanı yanına çağıran azarkeşlər həm İliçə, həm də futbolçularına motivasiya verdi.
Bəs, “UltraSumqayıt” fanklubu komandanın çıxışını necə dəyərləndirir? Komandanın qarşısına qoyulan hədəfə çatacağına – avrokuboklara yollanacağına inam varmı?
Bu sualla adı çəkilən azarkeş qrupunun rəhbəri Qüdrət Allahverdiyevə müraciət etdik. Onun “Football-plus.az”a cavabı:
“Sumqayıt” əvvəlki mövsümlərlə müqayisədə daha inamlı, cəsarətli oyun göstərir. Komandanın oyunlarını canlı izləyirik. Həllolunmaz problemin olduğunu düşünmürük. Sadəcə, kollektiv hücum xəttində güclənməlidi. Həmçinin qol buraxandan sonra çox irəli getmələri daha bir qol buraxmalarıyla nəticələnir. Bu çatışmazlıq aradan qaldırılacağı təqdirdə yaxşı nəticələr qazanmaq mümkün olacaq. Saşa İliç çempionatımıza bələd deyil. Ondan 2-ci dövrədə daha yaxşı nəticələr gözləyirik. Əsas odu ki, futbolçularda istək və həvəs hiss olunur”.
KƏNAN BAHADIR
Digər xəbərlər
