“Mövsümü ilk “üçlük”də tamamlayacağımıza inanırıq” – şirin xəyal, yoxsa reallıq?
“Sumqayıt” Misli premyer-liqasında yeni mövsümə uğurlu başladı. İlk turda “doğma divarlar” arasında “Kəpəz”i darmadağın edən “kimyaçılar” növbəti turda “Qarabağ”ı devirdi.
Bu gün “gənclik şəhəri”nin təmsilçisinin baş məşqçisi və heyəti haqda müsbət fikirlər səsləndirilir. Bəs, komandanın azarkeşləri Saşa İliçin fəaliyyətini, ilk iki turda qazanılan nəticələri necə qiymətləndirir?
Bu sualları “UltraSumqayıt” fanklubunun rəhbəri Qüdrət Allahverdiyevə ünvanladıq. Onun “Football-plus.az”a dedikləri:
“Saşa İliçin təyinatından sonra həm qələbələr qazandıq, həm də oyun tərzimiz yaxşılaşdı. Əvvəl ancaq müdafiə olunmağa üstünlük verirdik. İndi baxımlı hücumlar qurulur, qollar vurulur. Komanda nə oynadığını bilir, məzmunlu və planlı oyun göstərir. Əvvəl rəqiblər arxa xəttə qədər rahat irəliləyirdi. İndi onları mərkəzdə qarşılayırıq. Yeni transferlər düzgün seçimdi. İstər klub prezidenti Riad Rəfiyev, istərsə də Saşa İliç çox yaxşı iş görüb. Mövsümü ilk “üçlük”də tamamlayacağımıza inanırıq”.
Qüdrət bəy komandanın yeni transferlərə ehtiyacı olub-olmadığı haqda sualı belə cavabladı:“Bir və ya iki yeni futbolçuya ehtiyac var. Xüsusilə müdafiə xəttinə. Hər halda, klubun bu yöndə istənilən qərarına hörmətlə yanaşıb, dəstək göstərəcəyik”.
KƏNAN BAHADIR
Digər xəbərlər
