''Qalatasaray''la Seneqal Futbol Federasiyası (SFF) arasında İsmail Yakobsla bağlı gərginlik yaranıb.

"Football-plus.az" xəbər verir ki, Seneqalı qarşıda DÇ-2026-nın seçmə mərhələsi çərçivəsində Cənubi Sudan və Mavritaniya ilə oyunlar gözləyir.

Yakobs bu oyunlar üçün yığmasına dəvət olunsa da, sol müdafiəçi zədəli olduğu üçün İstanbulda qalmağa üstünlük verib. Ancaq hadisələrin bu cür axarı SFF rəsmilərini qane etməyib. Federasiya ''Qalatasaray''dan futbolçunun durumu ilə bağlı rəsmi məktub tələb edib.

Bundan başqa SFF Yakobsun yığmanın tibbi personalı tərəfindən müayinə edilməsini istəyir. Bu üzdən onlar ''Qalatasaray''dan futbolçunun Seneqala göndərilməsini tələb ediblər.

Maraqlıdı ki, düz bir il öncə - 2024-ün oktyabrına təsadüf edən yığma pəncərəsində də ''Cim-Bom'' ilə Seneqal arasında Yakobs üzündən bənzər problem yaşanmışdı. Həmin vaxt da bu futbolçu yığmaya dəvət almış, ''Qalatasaray'' isə qarşı tərəfə Yakobsun zədəli olduğunu bildirmişdi. Seneqal hətta bu üzdən müdafiəçinin adını siyahıdan çıxarmışdı. Amma daha sonra Yakobsun həftəsonu superliqa matçında oynaması və 90 dəqiqə meydanda qalması vəziyyəti dəyişdi.

SFF futbolçudan ölkəyə gəlməyi, ''Qalatasaray''dan isə bu məsələyə qarışmamağı tələb etdi. Yakobs da Seneqala yollanmış və bu olaydan xəbərinin olmadığını bildirmişdi.