''Qalatasaray''ın ''Liverpul''u məğlub etdiyi tarixi qarşılamaya damğa vuran məqamlardan biri də yerli fanatların performansı oldu.

Bir an olsun susmayan ''Cim-Bom''lular ingilislərə əsil cəhənnəm yaşatdılar. Oyundan sonra ''Liverpul'' cəbhəsində həm baş məşqçi Arne Slot, həm də bəzi futbolçular ''Qalatasaray'' fanatlarının yaratdığı atmosferi xüsusi olaraq qeyd etdilər. Ən diqqətçəkən açıqlamanı isə ''sarı-qırmızılar''ın yeni transferlərindən olan İlkay Gündoğan verdi.

Təcrübəli yarımmüdafiəçi qeyd etdi ki, rəqib cəbhədən bir futbolçu ona yaxınlaşaraq bu stadionda hər zaman belə atmosferin olub-olmaması ilə maraqlandı. Amma İlkay həmin o ismin adını açıqlamaq istəmədi. Türkiyə mətbuatı həmin futbolçunun kimliyini açıqlayıb.

İddialara inansaq, yerli fanatlara heyran qalan həmin şəxs ''Liverpul''un lideri Məhəmməd Salahdı. Kameralara düşən görüntülərdə Salahın 90 dəqiqənin ardından İlkayın yanına gələrək ondan nəsə soruşduğu görünür. Gündoğan da başını tərpətməklə ona müsbət cavab verir. Böyük ehtimalla İlkayın haqqında bəhs etdiyi olay məhz budu.

Oyunun gedişində Salahın stadiondakı hay-küydən narahat olduğunu göstərən daha bir epizod kameraya düşmüşdü. Telefonla çəkilən görüntüdə Salahın ehtiyat skamyasına yollanarkən uğultudan əlləri ilə qulaqlarını tutduğu görünmüşdü. Xatırladaq ki, bu klubda 400-dən çox qol vuran və ''Liverpul'' tarixinin ən məhsuldar 3-cü futbolçusu statusunda olan Salah ''Qalatasaray'' ilə oyunda gözlənilmədən ehtiyatda qalmışdı. Ulduz futbolçu yalnız ikinci hissənin gedişində meydana çıxmış, amma komandasının məğlubiyyətinə mane ola bilməmişdi.