“Qarabağ”ın Çempionlar Liqasının liqa mərhələsindəki mübarizəsi davam edir. İlk turda “Benfika”nın meydanından tarixi qələbəylə ayrılan “köhlən atlar” indi evdə həmin uğuru təkrarlamaq üçün dəridən-qabıqdan çıxacaq.

"Football-plus.az" xəbər verir ki, bu dəfə rəqib “Kopenhagen”di.

Məlum olduğu kimi, Ağdam təmsilçisi hələ cümə günü oyun üçün satışa çıxarılan biletlərdən 27 min 500-nün satıldığını açıqladı. Deməli, sabah keçiriləcək oyunda stadionda, necə deyərlər, iynə atsaq, yerə düşməyəcək. Həmin gün, sadəcə, 30 mindən bir qədər çox azarkeşin yox, bütün azərbaycanlıların qəlbi “Qarabağ”la döyünəcək. Odu ki, oyunun “CBC Sport”un efirində canlı yayınlanacağını bildirməkdə fayda var.

Çempionlar Liqası
Liqa mərhələsi, 2-ci tur
Qarabağ – Kopenhagen (Danimarka) 2:0
Abdulla Zubir, 28. Emmanuel Addai, 83.
Hakimlər: SƏRDAR GÖZÜBÜYÜK, Ervin Zeynstra, Patrik İnya, Yannik van der Laan (hamısı Niderland).
VAR hakimi: Rob Dyeperin (Niderland).
VAR hakiminin köməkçisi: Yerun Manshot (Niderland).
Bakı, Tofiq Bəhramov adına Respublika stadionu. Saat 20.45.

Əlbəttə, “Qarabağ” “doğma divarlar” arasında keçiriləcək matçda yalnız qələbə uğrunda mübarizə aparacaq. Axı bütün azərbaycanlıların arzusu, xəyalı məhz bu yöndədi. Üstəlik Lissabonda qazanılan sürpriz qələbə “köhlən atlar”dan gözləntiləri bir qədər də artırıb. Digər tərəfdən, məhz həmin qələbə Ağdam təmsilçisinə yanaşmanı da dəyişib. İndi hər kəs Azərbaycan çempionuna qarşı daha diqqətli və məsuliyyətli çıxış etməyin nə dərəcədə vacib olduğunu anlayır. Bu üzdən Danimarka təmsilçisinin Bakıda mümkün ədər səhvsiz oynamağa üstünlük verəcəyi dəqiqdi. Hər halda, Qurban Qurbanov da rəqibi təhlil edib, planlarını qurub və futbolçularına müvafiq tapşırıqları verib. Odu ki, “köhlən atlar”dan yana narahat olmağa dəyməz.

İndi sual doğuran yeganə məqam Marko Yankoviçin zədəli olmasıyla bağlıdı ki, böyük ehtimalla, onu ya Emmanuel Addai, ya da Kris Kuaku əvəz edəcək. Mütəxəssisin kimə güvənəcəyini isə yalnız oyundan təxminən bir saat əvvəl biləcəyik. Bununla belə, Nəriman Axundzadə sağlamlığına qovuşub. Düzdü, onun start heyətində meydana çıxacağına inanmaq çətindi. Lakin gənc hücumçunu ehtiyat oyunçular skamyasında görəcəyimizə şübhə yoxdu. Beləliklə, “Qarabağ” döyüşə hazırdı! Bəs “Kopenhagen”lə bağlı durum nə yerdədi?

Danimarka çempionu srağagün Bakıya gəlib. Klub saytının məlumatına görə, komanda paytaxtımıza 21 futbolçuyla təşrif buyurub. Bunlar Dominik Kotarski, Munaşe Qarananqa, Qabriel Pereyra, Pantelis Hatzidiakos, Viktor Klaesson, Yussufa Mukoko, Mohamed Elyunussi, Cordan Larsson, Lukas Lerager, Rodriqo Hueskas, Markos Lopes, Robert Silva, Yunnosuke Suzuki, Mads Emil Madsen, Yoram Zaque, Birger Melinq, Tomas Delaney, Elias Aşuri, Aleks Runarsson, Villiam Klem və Oskar Buurdu. Məlumatda bildirilib ki, 4 oyunçu, daha dəqiqi, Oliver Hoyer, Conathan Moalem, Maqnus Mattsson və Andreas Kornelius zədəli olduğundan heyətdən kənarda qalıb.

Maraq üçün xatırladaq ki, bu komandalar hələ 27 il əvvəl - 1998-ci ilin yayında - o vaxt Kuboklar Kuboku adlanan yarışda üz-üzə gəlib və “Kopenhagen” hər iki matçda böyük hesabla qələbə qazanıb - evdə 6:0, səfərdə 4:0. Növbəti duel isə 2017-ci ildə ÇL-nin pley-off mərhələsində baş tutub. Bakıda qələbə qazanan (1:0) “Qarabağ” səfərdə uduzsa (1:2) da, artıq tarixə qovuşan “səfər qolu” qaydası sayəsinsə tarixində ilk dəfə Çempionlar Liqasının əsas mərhələsinə yüksəlib. Deməli, bu komandalar tarixdə 5-ci dəfə üz-üzə gələcək.

Əlbəttə, bu qarşılaşmanın məhz bizimkilər üçün düşərli olması mütləqdi. Ancaq həm “Kopenhagen”in, həm də “Qarabağ”ın, necə deyərlər, formada olduqlarını bildirməliyik. Danimarka təmsilçisi sentyabrın 27-də ölkə çempionatının 10-cu turunun səfərdə keçirilən matçında “Sonnerjüske”ni məğlub edibsə, “Qarabağ” premyer-liqanın evdə baş tutan 6-cı tur matçında “Qəbələ”yə qalib gəlib. Odu ki, hansısa fiziki və ya psixoloji problemdən danışmaq yersiz olar. Bu gün yalnız ən yaxşı performansını sərgiləyən komanda qalib gələcək ki, bunu Lissabonda bacaran “Qarabağ”ın nəyə qadir olduğunu gördük. “Köhlən atlar”a güvənməmək üçün hansısa əsasımız yoxdu… Bəlkə də yolun sonunda bizi “24-lük” gözləyir. Odu ki, irəli, “Qarabağ”!

Yeri gəlmişkən, “Kopenhagen” də Bakıda dəstəksiz qalmayacaq. Danimarka çempionuna dəstək vermək üçün ölkəmizə 150 azarkeş gəlib.

KƏNAN BAHADIR