Azarkeş: Deyirəm, sakit dur!
Adil Şükürov: Sən məni evə göndərirdin?
Azarkeş: Hə, deyirəm, evə get!
Adil Şükürov: Səni məni evə göndərirdin? Evində yerin var? Adam kişi olar!

Bu dialoqu adi bir məhlə davasından götürməmişik. “Qəbələ” – “Kəpəz” oyunundan sonra gəncəlilərin baş məşqçisi Adil Şükürovla azarkeş arasında yaşanan söhbətdi. Oxumaq nə qədər acınacaqlı olsa da!

Birincisi, baş məşqçinin azarkeşlə mübahisəyə girişməsi çox absurddu. Açığı, mən də “Xəmsə” kimi elə bilmişdim ki, Adil Şükürov onlara yaxınlaşıb halallıq almaq istəyir. Bu gün-sabah 50 yaşı olacaq mütəxəssisin komandadan haqlı olaraq nəticə istəyən azarkeşlərə bu şəkildə polemikaya girməsinin izahı yoxdu...

3-cü turdan etibarən azarkeşlər “Adil, istefa” şüarını səsləndirir. Haqlıdılarmı? Gördük ki, haqlı imişlər. Sonda rəhbərlik bu işi gördü. Azarkeşin “evə get” şüarının altında “işləmə, evində otur” mesajı dayanır. Burda anlaşılmaz, qaranlıq qalan məqam yoxdu. Adil Şükürov isə cavabında “evində yer var?” deyir. Bəlkə Adil Şükürov özü utanmır, amma biz onun yerinə çox utandıq. Necə yəni “evində yerin var”? Demək istəyirsən ki, evində mənim yatmağım üçün yer var? Bu ki ədəbsizlik, abırsızlıq, bütün milli-mənəvi dəyərlərə, mentallığa tüpürməkdi? Həmin azarkeş Şükürovu bıçaqlasaydı, hansısa şəkildə cəzalandırsaydı, haqlı olacaqdı, yoxsa haqsız? Adil Şükürovun bu ifadəsinə oxşar sözlərə görə Gəncədə çox qan tökülüb. Oturub-durub dua etsin ki, yaxşı qurtardı.

Adil Şükürov son iki mövsümdə ikinci dəfə mövsümün əvvəlində komandanı götürür, 6-cı tura qədər çatdıra bilmir. Azarkeşin təzyiqinə tab gətirə bilməyən, “evə get” sözünə “evində yer var?” cavabı verən mütəxəssis bundan sonra hansı klubda baş məşqçi kimi çalışa bilər? Onu işə götürəcək klub rəhbəri azərbaycanlı azarkeş önündə hansı məntiqli izahı verə bilər?

Çox güman, “Qəbələ” – “Kəpəz” oyunu Adil Şükürovun böyük futbolda sonuncu oyunu idi. Uşaq futbolunda özünə iş yeri axtarsın, bəlkə orda nəsə edə bilər. Ən azı bu qədər təzyiqlə üz-üzə gəlməz.

MÜZƏFFƏR QULUZADƏ