Bildiyiniz kimi, hazırda “Formula-1” üzrə dünya çempionatında 10 komanda mübarizə aparır.

"Football-plus.az" xəbər verir ki, uzun-uzadı davam edən müzakirə və mübahisələrdən sonra “Kadillak”ın qarşısında da “yaşıl işıq yandırıldı”. Yəni Amerika komandası gələn il DÇ-yə 11-ci iştirakçı kimi qatılacaq.

“Kadillak”la bağlı ehtiraslar soyumamış üfüqdə 12-ci komanda da görünüb. Belə ki, “Katerhem” 2027-ci ildə “kral avtoyarışları”na qayıda bilər. Küveytdən ola biznesmen Saad Kassis-Məhəmməd brenddən kommersiya maraqları üçün istidafə etməklə bağlı lisenziya alıb. Onun “SKM Capital” investisiya şirkəti “SKM Racing” layihəsinə ilk üç il ərzində 280 milyon avro yatırmağı planlaşdırır.

Şirkət artıq Silverstounda texniki mərkəz icarəyə götürüb, həmçinin gələn ilin əvvəlində Beynəlxalq Avtomobil Federasiyasına DÇ-də iştirakla bağlı sifariş ərizəsi ünvanlayacaq.

Xatırladaq ki, Böyük Britaniyada qərarlaşan “Katerhem” 2010-14-cü illər aralığında turnirdə çıxış edib, ancaq komandanın pilotları 1 xal da toplamayıb.