Beynəlxalq Avtomobil Federasiyası (FIA) “Formula-1” üzrə dünya çempionatında 2025-26-cı illər üçün “Andretti”nin 11-ci komanda olmaqla bağlı ərizəsini rəsmi şəkildə qəbul edib.

"Football-plus.az" xəbər verir ki, qurumun saytında artıq bu haqda məlumat yer alıb. FIA prezidenti Məhəmməd bin Sulayem isə bu məsələ ilə bağlı belə deyib:

Proseslərin bundan sonrakı axarına gəlincə, Amerika komandasının çempionata qatılması ilə bağlı kommersiya məsələləri də müzakirəyə çıxarılaraq həll olunmalıdı. Bir müddət əvvəl “Andretti”nin avtomobil istehsalçılarından “General Motors” şirkəti ilə onun brendi olan “Kadillak” sayəsində dəstəklənməsi ilə bağlı razılığa gəldiyi xəbər verilmişdi. Maykl Andretti 1978-ci ildə “Formula-1” yarışlarının qalibi olan Mario Andrettinin oğludu. Andretti ailəsi artıq “İndikar”, “Formula E” və “Extreme E” çempionatlarında komandaya malikdi.

Bir daha xatırladaq ki, bu ilin əvvəlində “Formula-1” üçün müraciətlərin qəbulu elan ediləndən sonra FIA çoxlu sorğu alıb, lakin seçimin ikinci mərhələsinə yalnız dörd namizəd buraxılıb. FIA bu komandaların adlarını açıqlamasa da, görünür, söhbət “Andretti” ilə yanaşı, Kreyq Pollokun “Formula Equal” layihəsi olan “Hitech”dən və Cənub-Şərqi Asiyadan olan “LKY SUNZ” komandasından gedir.

İdman, texniki, maliyyə, ekoloji davamlılıq və sosial təsir meyarlarının qiymətləndirilməsini əhatə edən hərtərəfli araşdırmadan sonra FIA belə qənaətə gəlib ki, yalnız “Andretti” qurumun bütün ciddi tələblərinə cavab verir. Digər namizədlərə gəlincə, FİA onları müsabiqənin nəticəsi ilə bağlı məlumatlandırıb.

Hazırda “Formula-1”də çıxış edən komandaların əksəri turnirə 11-ci iştirakçının qatılmasının əleyhinə olsa da, göründüyü kimi, fərqli düşüncə qalib gəldi. “Andretti”nin namizədliyini dəstəkləyənlərdən biri də “Mersedes”in pilotu, yeddiqat dünya çempionu Lüis Hemiltondu: “11-ci komandanın gəlişi ilə çempionat daha cəlbedici olacaq. Həmişə hiss edirdim ki, start xəttində maşın azdı. Hərçənd mənim bu məsələdəki dəstəyimdən narazı qalan adamlar da olacaq. Ancaq hesab edirəm ki. yeni komandanın gəlişi həm də çoxlu yeni iş yerinin yaradılması imkanı deməkdi. Həmçinin qadın pilotun iştirakçılar sırasına qoşulacağı ehtimalı da artır. Düşünürəm ki, belədə yarış daha maraqlı olacaq”.

“Formula-1” dünyası ilə bağlı daha bir maraqlı xəbər var. Belə ki, “Apple” şirkəti dünya çempionatının mərhələlərinin eksklüziv yayın hüququna yiyələnə bilər. Bu haqda xəbəri “Business F1” yayıb. Adı çəkilən qaynağa inansaq, “Apple” dünya çempionatının illik yayın hüququ üçün 2 milyard avro ödəməyə hazırdı. Maraqlıdı ki, bu, qlobal televiziya hüquqlarının satışından əldə olunan indiki vəsaitlə müqayisədə iki dəfə artıqdı. Xəbərdə o da bildirilir ki, sövdələşmə baş tutacağı təqdirdə belə, “Apple” müəyyən müddət ərzində fərqli yayınçı şirkətlərlə imzalanan müqavilələrin şərtləri üzündən bütün dünyanı əhatə edə bilməyəcək. İş ondadı ki, həmin müqavilələrdən bəziləri 2029-cu ilə qədər nəzərdə tutulub. “Apple” hazırda “Formula-1”ə əsaslanan kontentin yaradılması üzərində çalışır. Builki dünya çempionatının bəzi mərhələləri ərzində Bred Pittin baş rolda olduğu filmin çəkilişi həyata keçirilib.